Биз гьар гюн дегенлей, Украина топурагъында хас операцияда ортакъчылыкъ этеген бизин асгерчилерибизге олай савгъат берилген, булай савгъат берилген деп эшитебиз. Тек олар шо савгъатланы алмакъ учун не гьалларда, не ерлерде, не къайдаларда гечелени-гюнлени гетерегенни, нечик къыйынлы гьалланы башдан гечирегенни толу кюйде англап да битмей къалабыз.
Бир гесек алда «Дагъыстанны халкъ игити» деген гьюрметли атгъа оьркъазанышлы Ислам Агьматпашаевич Бекболатов да ес болду. Исламны бу савгъаты биринчи тюгюл.
Ислам Бекболатов 1990-нчы йылда тувгъан, оьз тенглилери булан ата юртундагъы 2 номерли школада охугъан. Ислам гиччиден кимге де иржайып тюгюл сёйлемейген, рагьмулу, уялчан хасиятлы улан. Ону бу хасиятларын охутгъан муаллимлери де эсгере бола.
Ислам школаны битдирген сонг, асгерде къуллукъ этди. Ол асгер къуллугъун кютеген бёлюкден ону атасы Агьматпашагъа да, анасы Умужатгъа да булай тизив уланны тарбиялагъаны саялы баракалла кагъызлар да геле турду. Ватаныны алдындагъы гьакъ борчундан да къутулуп, ефрейтор болуп къайтгъан Ислам кёп де ойлашмайлы, оьзюню гележек касбусун асгерчилик булан байламагъа токъташа. Шо арада Ислам оьр охув ожакъны юристлер гьазирлейген факультетинде заочно да охуй.
Гьасили, Ислам 2010 –нчу йылдан берли асгерчиликни ёлунда ара бёлмей къуллукъ эте. Ол инг башлап, Мычыгъыш Республиканы Шали деген ериндеги асгер бёлюкде къуллукъ этди. Сонггъу йылларда Ислам ёлдашлары булан хыйлы-хыйлы ерлерде оьзюню алдына салгъан борчланы бир де бюдюремей кютген. Ону бу къайратлы хасиятлары саялы командирлери де, ёлдашлары да кёп сюе ва абур эте.
2022-нчи йылда Украина бойда хас асгер гьаракат башлангъанда, Ислам ва ону ёлдашлары биринчилерден болуп бизин уьлкебизни парахатлыгъын сакъламагъа, Ватаныбызны якъламагъа гетди. Озокъда, савутлу къалмагъалларда, от-ялынны ичинде биревге де рагьат болмайгъаны, биревню де аямайгъаны белгили. Хас операцияны барышында берилген бир тапшурувну кютювде уллу атышывлагъа тюшюп, контузия ала. Шо вакътиде бир гесек госпитальда ятып, бираз къолай болгъан сонг уьюне гелген.
Эсгерилген тапшурувну кютювде гёрсетген къоччакълыгъы учун Ислам Бекболатовгъа бир «Къайратлыгъы учун» деген медаль берилген. Арадан аз заман да гетмейли, Ислам савлугъун бираз беклешдирип, асгер борчун кютмеге алгъасады.
Гьали буссагьат Ислам Шалиде алдагъы еринде санитар машинни гьайдавчусу болуп чалыша. Исламны ата-анасына мундагъы асгер бёлюкден де кёп керенлер баракалла кагъызлар гелген, гьюрметлев грамоталар берилген.
Ислам яшав ёлдашы Женнетхан да булан 2 уланны тарбиялап тура. Бу уланлар да атасы йимик Ватанына пайдалы, ата-анагъа эдепли уланлар болуп оьсежегине инанабыз.
Исламгъа дагъы да уллу уьстюнлюклеге етмеге къатты савлукъ да, оьмюр де ёрайбыз. Шолай къоччакъ уланлар арабызда бар болсун деп айтмагъа сюебиз!!
Барият НЮРЮТДЮНОВА.
