Хасавюртдагъы «Водник» деген маданият центрда Эндирейни халкъ театры «Ай ярыкълы гечелер» деген спектаклни гёрсетген. Бу спектаклни шаир ва драматург Атав Атаевни пьесасына гёре театрны режиссёру Къурайыш Къонакъбиева салгъан. Хасавюртда ва районну юртларындан гелген къаравчулар артистлени оюнун уллу разилик булан къабул этген, харс урувлар булан къаршылагъан.
Сагьнада юрюлеген гьаракат юрт ерде бола. Шагьардан юртгъа гёчюп Саният деген яш тиштайпа геле. Ол оьзю турагъан уьйню къалкъысына триколор антенна сала. Хоншудагъы бойдакъ гиши Ата ону антеннасына оьзюню телевизорун ялгъай ва хоншусу Тата да булан сав гюн шогъар багъып туралар. Антеннаны багьана этип, Саният булан кёп лакъыры бола. Татаны агьлюсю Кабират ва хоншудагъы Атаны ушатагъан бойдакъ тиштайпа Равгьан бу гьалны ушатмай. Не этип де Саниятны юртдан къувалайгъан кюйню излейлер. Гьатта юртну молласы болма къаст этип айланагъан Гьюсен деген жагьил улангъа барып да оьзлени мурадын айталар. Ол да булагъа арив сёйлеп, бир чара гёрербиз деп ёлгъа сала. Тек оьзюню юреги Саниятда. Ону оьзюне экинчи къатын этип алма хыялы бар.
Спектаклде ДР-ни ат къазангъан артисткасы Зоя Сатуева, Сайдулла Дадаев, Къурайыш Къонакъбиева, Руслан Устакъов, Байрамали Акъаев, Гюлнара Арслангереева оьзлеге тапшурулгъан ролланы уста кюйде, къужурлу ойнай ва къаравчуланы разилигин алма бажара.
Эндирейни халкъ театры июн айны ичинде Чагъаротаргъа, Боташюртгъа сонг Бабаюрт районну юртларына сапар чыгъажакъ. Июль айны ичинде буса Мычыгъышдагъы Борагъан юртгъа, Дагъыстанны уллу юртлары Къоркъмаскъалагъа, Къарабудагъгентге, Тёбен Къазанышгъа барып бу спектаклни гёрсетме умуту бар.
Я.БИЙДУЛЛАЕВ
СУРАТДА: спектаклден сонг.
