Россияны Президентин сайлавланы экинчи гюнюнде къумукъланы бырынгъы юртунда эсде къалар агьвалат болду.  Дагъыстанны Башчысы Сергей Меликовну ортакъчылыгъы булан юртда уллу спорт комплекс ачылды. Шо шатлы жыйында Дагъыстанны Халкъ Жыйыныны депутатлары, Олимпия оюнланы чемпиону Завур Угуев, къошулчан ябушувлардан дюньяны чемпиону Рустам Хабилов, Дагъыстанны Гьукуматыны Председателини орунбасары Муслим Телякъавов, транспорт ва ёл хозяйство, спортну министрлери Жамболат Салавов ва Сажит Сажитов, шолай да тюрлю-тюрлю идараланы вакиллери ортакъчылыкъ этдилер.

 

Эндирейлилер ва айлана юртланы вакиллери, районну белгили спортчулары Дагъыстанны Башчысын харс урувлар булан къаршылады, неге тюгюл де С.Меликов гьар заман юртгъа сююнч алып геле.

– Артдагъы йылларда Россияны Оьр башкомандующийини ва Гьукуматыны янындан таба, яшавлукъ маънасы булангъы идараланы къурувда биз кёп яндан якълав табып турабыз, – деди ол жыйылгъанланы алдында сёйлей туруп. – Алдындагъы гюнлерде Дагъыс­танны Гьукуматыны башчысы А.Абдулмуслимов 5 янгы идара ачды. Шолардан дёртевю — яшлар бавлары. Бугюн буса биз яхшы ишлени Эндирейде давам этебиз. Эндирей Дагъыс­танда чы нечик де, Темиркъазыкъ Кавказ бойда да уллу ва бырынгъы, минг йыллыкъ тарихи булангъы юртланы бириси. Хасавюрт район буса – инг уллу ва спорт якъдан айтылгъан регионубуз. Бу бойдан чыкъгъан спортчуланы атлары савлай дюньягъа белгили.

Сергей Алимович Президентни Федерал Жыйынгъа этген Чакъырывунда физкультура ва спортну оьсювюне, тарыкъ-герек булан таъмин этивге, тез къурулагъан материаллардан янгы ва гьалиги талаплагъа жавап береген спорт идаралар къурмакъны гьакъында айтгъанны да эсгерди. Ол шо тапшурувланы яшавгъа чыгъарма кёмеклешеген Россияны спорт министри Олег Матыцинге ва Дагъыс­танны спорт министри Сажит Сажитовгъа баракалла билдирди.

–Бу къурулгъан комплексде спорт булан машгъул болма, ярышлар оьтгерме ва гёрмекли даражалагъа етишмек учун бары да имканлыкълар яратылгъан, — деп давам эте сёйлевюн С.Меликов. –Алда Жамболат Шапиевич, гьали ону ишин давам эте туруп, районну башчысы Арсланбек Абдулмажитович спортну оьсювюне айрыча тергев берелер. Оланы къастлыгъы булан янгыз бу юртда 2 школа ва 2 яшлар баву ачылды, бирдагъы школа, маданият къала ва больница мукъаятлы ярашдырылды, юртну орамлары асфальт этилинген, демек, адамланы яшав гьалларын яхшылашдырмакъ учунгъу ишлер юрюлген ва юрюле.

Сергей Меликов Эндирей минг йыллар алда къурулгъанны ва  V-ХIХ юз йылларда уллу шагьар болуп тургъанны эсгерди, 10 мингге ювукъ адам яшай­гъан юртну бай тарихи барны да айтды. Муна шулай, бир юртдан башгъа юртлагъа гёче туруп, тез арада Дагъыстанда адамлар учун агьамияты бар идараланы къурув давам этилежекни де эсгерди.

«Идараланы къурмакъ бир, шоларда бажарывлу ва оьзлени ишин сюегенлер ишлемек – муна аслусу», – деп де къошду.

Шондан сонг сёйлеген Олимпия оюнланы чемпиону Завур Угуев яшлагъа олимпия оьрлюклени алмакъны ёрады.

Хасавюрт районну башчысы Арсланбек Алибеков Дагъыстанны Башчысы Сергей Алимовичге, шу къурулушну башлагъан Жамболат Шапиевичге, Дагъыстанны спортуну министри Сажит Халилшагьмановичге ва къурувчулагъа баракалла билдирди. Районда Россия оьлчевдеги ярышланы оьтгерме имканлыкълары булангъы спорт комплекс ачылгъаны булан жыйылгъанланы къутлады. Ол яшёрюмлеге эркинликде спорт булан машгъул болуп, оьр даражалагъа етишмекни ёрады. Шолай ёравланы Эндирей юртну башчысы Ирази Абсаламов да айтды.

Къызыл лента гесилди ва жыйылгъанлар комплексни ичине гирди. Гертиден де, спорт къурулуш мукъаятлы кюйде къурулгъан десек азлыкъ да эте. Мунда баскетболдан, волейболдан, авур атлетикадан, тутушуп ябушувдан, мини футболдан, гандболдан, теннисден, боксдан, ябушувланы гюнтувуш къайдаларындан ва аэробикадан ярышлар оьтгерме болардай имканлыкълар бар. Шоланы гьарисини майданчалары да бар. С.Меликов сав райондан жыйылгъан яш спортчулар булан гьаллашды.

Районну волейбол командасы артдагъы йылларда Дагъыстанны чемпиону болуп тура, шоланы экевю Россияны жыйым командасына къабул этилинген. Волейбол ойнайгъан команданы тренери Дагъыстанны Башчысына С.Меликовну аты язылгъан футболка савгъат этди ва топ тапшурду, яш боксёрлар буса оьзлени бажарывлугъун гёрсетдилер.

Ботаюртлу  яш Анвар Гьажиев бокс булан машгъул экени 4 йыл болагъанны, Россияны чемпиону ва спортгъа кандидат болма къаст этегенин айтды. Сергей Алимович оланы гьариси булан гьаллашды, олагъа тынглады ва насигьатлар берди.

– Кёп тюрлю спорт къайдалар булан машгъул болма бажарылагъан комплекс Дагъыстандагъы спортну оьсювюне болушлукъ этежекге сёз ёкъ, – дей жыйындан сонг мени булан ла­къыр эте туруп, «Эндирей» деген спорт школаны директору Алик Асакъаев. – 4 минг квадрат метр ерден де артыкъ майданда ерлешген  спорт къомплексде 10 тюрлю спорт булан машгъул болма ерлер де бар, бары да заллар хас спорт къураллар булан да ясандырылгъан. Сёз ёругъуна гёре айтсам, шу идараны къурма эки къурумгъа берилген эди: «Инвестстрой» (генеральный директору Мурат Мутаев) ва «Магстрой» (гендиректору Магьаммат Магьамматов). Шо эки де къурум бек яхшы ишледи ва къурулушну гёрсетилген 1 йыл 8 айдан тамамлады. Магьаммат Агьматович ва Мурат Агьматович ишин бек  къурумлу юрютдю. Сен оьзюнг де гёрдюнг мукъаятлы этилингенни. Шоланы прорабы Ражап Гьюсейнович Жамалдинов да ишге берилген адам. Бираз тетик ерин гёрсе де, янгыдан этдире эди. Шоланы барысына да баракалла билдирме сюемен… Кёп оюнланы ярышларын юрютме болагъан залны этилинген кююн англадынгмы? Шону полу тюбюне резинлер де салып, европа къайдалы этген. Шулай зал савлай Темиркъазыкъ Кавказда ёкъ. Залны генглиги-узунлугъу 27х42 метр. Шунда баскетбол, гандбол, волейбол, футбол, бадминтон ва шолай кёп адам къуршалагъан оюнланы оьтгерме бола. Исси вакътиде шолай оюнланы оьтгермек учун къырда да майданчалар гьазирленген.

Мен де Дагъыстанны Башчысы булан комплексни айланып чыкъдым, мунда дагъы да кёп тюрлю заллар бар… Комплексни айланып гиччи заллар да бар, бирлеринде боксдан, башгъаларында гимнастика, аэробика, тай бокс, теннис ойнама бола.  Юрюлюп турагъан оюнланы тувра эфирге салып болагъан кюйдеги аппаратлар да, видео-конференциялар юрютеген зал, киринеген, чечинеген ерлер чи гьар залны янында бар демеге ярай.

– Янындагъы эсги залны нечик къоллама сюесиз? – деп сорайман А. Асакъаевге.

– Онда авур атлетиканы секциясы ишлей, мунда сыймайгъан секцияланы бирлерин онда чыгъарма сюебиз. Гьали юртлу яшлар бары да бир бойгъа ба­гъып юрюйлер, неге тюгюл алдагъы йылларда янгы комплексни янында гиччи  ва уллу футбол майданларыбыз, районну ватандашлары ГТО-ну талапларын кютсюн учунгъу ерлер де этилинген эди. Айтагъаным, юртну бу бою спорт къурулушлардан толгъан ва бары да адамлагъа ­онгайлы ерде де ерлешген.

–Спорт комплексни гёргенлер бек гьайран болдулар, юртгъа уллулукъ этмежекми деген лакъырлар да болду?..

–«Эндирей» деген спорт школада 35 адам ишлей ва уьч юртда филиаллары да бар: Тотурбийкъалада ва Темиравулда – футболдан, Новогагатлиде буса – ушу-саньдадан. Ярышлар эте бусакъ, ер къыдыра къала эдик. Гьали Хасавюрт бойда оьтгерилежек Дагъыстанны оьлчевюндеги ярышлар да бизин спорт комплексде юрюлежек. Юртлу яшлагъа да спорт булан машгъул болма уллу имканлыкълар ачылды.   Юртдан буса спорт булан 500-ге ювукъ яш машгъул. Олар Россия ва Европа даражалы ярышларда ортакъчылыкъ да этелер. Шулай имканлыкълар болдурулгъанда, натижалар дагъы да гёрмекли болар деп эсиме геле.

 

Гебек КЪОНАКЪБИЕВ.СУРАТЛАРДА: Эндирейдеги

спорт комплексни ачылывундан гёрюнюшлер.