Тамазатёбе юртда, олай да Бабаюрт районда Аттутаровланы тухумун танымайгъанлар кёп аздыр. Бу тухумну вакиллери юрт хозяйство, билим берив, савлукъ сакълав тармакъларда чалышалар.

Тухумну башын тутгъан Алипхан Мажитович Аттутаров Уллу Ватан давну ортакъчысы болгъан. Уллу Уьстюнлюкню алып, тёшюн дав савгъатлардан безеп, ол ата юртуна къайтгъан. Давдан сонггъу йылларда юртдагъы колхозда, сонггъа таба совхозда ишлеген. Загьмат булан юрт хозяйство тармакъда оьмюрюн йиберген. Ону иниси Шихали де Уллу Ватан давда ортакъчылыкъ этип, ата юртунда загьматгъа къуршалгъан гьюрметли тамаза болгъан. Ол да дав савгъатлагъа лайыкълы болгъан.

Бугюнлерде де Украина бойда хас асгер гьаракат оьтгерилегенде, Аттутаровланы тухумундан оьзден уланлар уьйде парахат турмайлар.

Айтагъаным, Тимурхан Аттутаров оьзюню эсли чагъына да къарамайлы, мобилизация оьтгерилегенде военкоматгъа барып, гёнгюллю кюйде хас асгер гьаракатда ортакъчылыкъ этмеге гьазирлигин билдирген.

Тимурхан  – Алипханны  торуну, ону уллу уланы Дерметханны авлети. Ол 1978-нчи йылда тувгъан. Хасавюрт шагьардагъы педагогика училещеде охугъан. ­ Ону тувмадан йыр айтмагъа гьюнери бар. Ол уста кюйде музыка алатларда да ойнай. Ол– юртда гьар тюрлю ерлерде ишлеген улан. Пагьмусу баргъа бир вакътини ичинде маданият тармакъда да ишлеген. Халкъ арада ону пагьмулу йырав ва музыкант гьисапда кёп адам таный.

Тимурхан Аттутаров хас асгер гьаракатда оьзю­не тапшурулгъан борчларын къоркъув билмей, тын­дырыкълы ва жаваплы кюйде кюте. Ватанына амин болуп, бизин пачалыкъны азатлыгъын ва сакълыгъын къоруй десек ялгъан болмас.

Къалсын Аттутаров да хас асгер гьаракатда биринчи гюнюнден тутуп  ортакъчылыкъ эте. Ол – Алипханны экинчи уланы Эсенгелдини уланы Гьюсейханны авлети.

Ол 1997-нчи йылда Волгоград областда тувгъан. Шонда тувуп  оьссе де,  ата юрту Тамазатёбени унутмай. Къалсын гиччиден оьзюню болажакъ касбусун асгер булан ты­гъыс кюйде байламагъа токъташгъан. Ол Саратов шагьардагъы Милли гвардияны Жуковну атындагъы Къызыл Байракълы военный институтун битдирген.

Украина бойда юрюнлеген хас асгер гьаракатда гёрсетген игитлиги ва къоччакълыгъы учун Къалсын Аттутаров Суворовну меда­лына ес болгъан. Юртлуларыны Къалсын булан оьктем болмагъа гьакъы бар.

Али Аттутаров да Россияны оборона министерлиги булан дыгъар байлап, Ватанына къуллукъ этмеге гёнгюллю кюйде гетген. Али 2000-нчи йылда тувгъан. Ол Алипханны уланы Эсенгелдини уланы Арсенни авлети. Ол гетген йылны декабр айындан тутуп Донецк бойда хас асгер гьаракатда ортакъчылыкъ эте.

Гёресиз, Алипханны яшлары ва оланы авлетлери Ватанына уллатасы йимик гьалал къуллукъ эте. Элини кёгюн къара булут япгъанда, немис-фашист душманлагъа къаршы тургъан Алипхан Аттутаров йимик, бугюнлерде ондан къалгъан яш наслу да Украинаны боюнда миллетчилеге къаршы тургъанлар.

Аттутаровланы тухумундан бир де осал уланлар чыкъмагъан. Олар – бугюнлерде де «гьайт» дегенде,  «вайт» деп арагъа чыкъмагъа гьазир къатарбашлар.

Уллатасы Алипхан уланларына Ватангъа бакъ­гъан якъдагъы сюювню сингдирип болгъан. Олар да атасындан уьлгю алып дегенлей, шо сюювню авлетлерине ва торунларына сингдирмеге бажаргъан.

Ватанны герти якълавчулары ва патриотлары Аттутаровлагъа уьстюнлюкню алып, уьюне сав-саламат къайтмагъа насип болсун деп айтмагъа сюемен.

Герти патриот ругьда тарбиялангъан уланлар баргъа биз сююнмей болмайбыз. Олай уланлар арабызда кёп болсун. Олар булан гележегибиз ярыкълы ва талайлы болажакъгъа инанабыз

 

Бэлла ГЬАЖИГЕЛДИЕВА,

Россияны журналистлерини

союзуну члени.