Талатгюн, сентябр айны 26-сында, еттинчи керен сайлангъан Дагъыстанны Халкъ Жыйыныны гезикли 25-нчи сессиясы болду. Сессияны ДР-ни Халкъ Жыйыныны председатели Завур Аскендеров ачды ва юрютдю. Бизин республиканы парламентини депутатлары шону барышында 24 тюрлю масъаланы арагъа салып ойлашгъан ва тийишли къарарлар къабул этген.
Сессияны гюнлюк низамында белгиленген аслу масъалаланы арагъа салып ойлашгъынча депутатлар Россияны Президенти Владимир Путинни Указы булан Украина бойда юрюлеген асгер гьаракатда гёрсетген къоччакълыгъы учун Суворовну медалы булан савгъатлангъан республика парламентини депутаты Абдулла Магьамматовну къутлады.
Шондан сонг ДР-ни цифровой оьсювюне къарайгъан министри Юрий Гьамзатовгъа сёз берилди. Ол шагьарланы ва юртланы Интернет байлавлукъ булан таъмин этивге байлавлу не къадар гьаракат юрюлегенин малим этип сёйледи. Шо тармакъда яшавгъа чыгъарылагъан проектлени уьстюнде айрыча токътады ва депутатланы соравларына жаваплар къайтарды.
Депутатланы алдына чыгъып сёйлеген Халкъ Жыйыныны экономикагъа, инвестициялагъа ва далапчылыкъгъа къарайгъан комитетини председатели Сефер Алиев Интернет байлавлукъну имканлыкъларындан асувлу пайдаланса, бары да дегенлей тармакъланы оьсювюне болушлукъ этмеге болагъанын ташдырды.
Шо сессияны барышында арагъа салынып ойлашылгъан законланы проектлери экинчи ва ахырынчы охувларда къабул этилгенин айрыча эсгермеге тюше.
Шоланы арасында ата-анасыз къалгъан етим яшланы якълавгъа байлавлу къошум чараланы белгилейген закон да бар. Эсгерилген законну гесимлерине асасланып, Украина бойда юрюлеген хас асгер гьаракатда оьлгенлени яшларыны яшавлукъ шартларын яхшылашдырывгъа артыкъ агьамият берилежек. Сессияда дагъы да артгъа салмай чечмеге тюшеген бир-бир масъалалагъа да къаралды.
Н. БАЙБОЛАТОВ.
