30-нчу июнда Хасавюртда яшёрюмлени чебер иш гёреген коллективлерини фестивалы оьтгерилди. 3-нчю гезик оьтгерилеген шо шатлы байрамда республиканы ичиндегилени айтмасакъ да, Къарачайдан «Минги-Тав», Ульяновскиден  «Волгари» деген бийив­ ансамбллер ва Ингушетияны халкъ артисткасы Луиза Элжуркаева да ортакъчылыкъ этдилер.

Къутлав сёзлеринде Хасавюрт шагьарны депутатларыны башчысы Гьажимурат Умаханов, шагьарны башчысыны орнунбасарлары Арсен Муртазалиев ва Ражап Генжаев маданиятны халкъланы арасында дослукъну беклешдирмек учун уллу агьамияты барны айтдылар.

Бийивлер, йырлар, адатлагъа багъышлангъан гёрюнюшлер къаравчуланы бек кепине гелди. Къонакълар ва ерли коллективлер бирини артындан бири чыгъып, оьзлени пагьмуларын гёрсетип, къаравчуланы рази этдилер.

Фестивальны ахырында бары да ортакъчылагъа дипломлар ва эсделик савгъатлар тапшурулду.

 

Къ. БИЕВ.