Дагъыстанны Халкъ Жыйыныны Председатели Завур Аскендеров ишчи сапары булан Буйнакскиде болгъан. Шагьар администрацияда оьтгерилген генгешде парламентни комитетлерини башчылары, министерликлени жаваплы къулукъчулары, ДР-ны Жамият палата-сыны вакиллери ортакъчылыкъ этген.
Генгешде бу йылны июн айыны 17-деги бузлу янгурдан зараллангъанлагъа кёмек этивню масъаласына къаралгъан. Белгили кюйде, шо заман табии балагьдан 2 мингден де артыкъ яшавлукъ уьйлени къалкъылары, хыйлы машинлер бузулгъан. З.Аскендеров эсгергени йимик, арадан уьч ай оьтген сонг да, шагьарда ва районда гьали де тийишли кёмек гьакъланы алмагъан агьлюлер бар ва жыйылгъанлагъа шо масъаланы тез заманны ичинде чечме герекни эсине салгъан.
Генгешден сонг, Халкъ Жыйынны Башчысы заралгъа тарыгъан адамлар булан ёлукъгъан ва олагъа кёмек этивню масъаласын парламент оьз тергевюне алгъанын билдирген.
