Табиат булан байлавлу агьвалатланы ахтарагъан алимлер билдиреген кюйде, Каспий денгизни теренлиги сай бола бара. Шолайлыкъ денгизни Магьачкъала бойларында бек билине. Магьач-къала буса, Россияны къышда бузламайгъан биргине бир порту.
Денгизни суву аз болгъан сайын, шо уллу, гьар тюрлю юклени ташыйгъан гемелеге четимлик тувдура. Гьар йыл Магьачкъала портгъа Ирандан ва Азербайжандан, аслу гьалда цемент булан, орта гьисапда 260 геме геле. Россия да бизин портдан таба шо пачалыкълагъа 300 минг тон будайны ва гьабижай урлукъну бакъдыра. Гемелер сай ерлерден юзюп болмайгъан гьалгъа тарыса, экономикабыз нечакъы заралгъа тарыжагъын англама къыйын тюгюлдюр.
Азербайжан алимлер Каспий денгизни сувуну аз болувуна тамашалыкъ этмей ва шо гьар 250 йылны ичинде такрарлана гелеген гьал деп токъташдыра. Сонг денгиз оьзюню алдагъы дазуларына къайта.
Алав АЛИЕВ.
