Белгили экени йимик, алдагъы гюнлерде Ислам Магьачев низамсыз ябушувларыны бирлешивю гьисапланагъан UFC къурумуну чемпиону деген атгъа гене къайтып лайыкълы болмакъ учун америкалы спортчу Дастин Порье булан тогъатартгъан.
Дагъыстанлы кочап шо ябушувда гене де усталыгъы булан бирге бажарывлугъун гёрсетип, оьзюню енгмеге болагъанлар аз экенин бирдагъы керен де исбатлагъан. Ябушувну ахырынчы бешинчи тиретинде ол оьзю булан тогъатартмагъа чыкъгъан спортчудан уьст гелген. Америкалы спортчу бизин кочапдан тиеген урушланы авурлугъун гётермеге болмай, ябушувну лап башындан ихыланып турагъангъа, Ислам Магьачев тогъатартывну дагъы да тез тамамламагъа имканлыгъы болса да, ол лап ахырда Дастин Порьени бувуп токътатгъан.
Шолайлыкъда, Ислам Магьачев низамсыз ябушувланы кочабы гьисапда оьтгерген 26 тогъатартывдан 14-юн утгъаны гьакъда айтмагъа бажарыла. Ону гезикли уьстюнлюгю булан Дагъыстанны Башчысы Сергей Меликов да къутлагъан. Ону сёзлерине гёре, бизин кочап тогъатартывну барышында UFC-ге къуршалгъанланы арасында инг бажарывлу спортчу экенин гертилежегине бирев де шеклик этмеген. Бизин республиканы ёлбашчысыны Telegram-каналында шо гьакъда маълумат берилген.
Насрулла БАЙБОЛАТОВ
