Март айны 11-нде Дагъыстан федерал ахтарыв центрны тарих, археология ва этнография институтуну социология бёлюгюню алдынлы илму къуллукъчусу, философия илмуланы кандидаты Загьит Абдуллагьатов «Родные языки в Дагестане: Современные угрозы» деген илму семинар оьтгерди.

Шонда Дагъыстан федерал илму центрны къуллукъчулары, жамият къурумланы вакиллери, Оьр охув ожакъларда дагъыстан тиллени ва адабиятланы дарс беривчюлери ортакъчылыкъ этди. Аслу докладчы Загьит Абдуллагьатов Дагъыстан халкъланы милли тиллерини гьалын, миллетлени вакиллерини ана тиллерине янашывну тындырыкълы кюйде ахтарывлар этген. Ол шо ахтарывланы гьасиллерини гьакъында толу кюйде маълуматлар берди.

Илму семинарны мурады дагъыстан халкъланы ана тиллерини ватандашланы ич ва тыш миграцияны таъсирини натижасында бугюнгю гьалын жамиятны арасында арагъа салып ойлашмакъ учун имканлыкъ яратмакъ эди.

Семинарда сёйлеген психология илмуланы доктору Анжелика Цахаева, ДР-ни Халкъ Жыйыныны депутаты, ДГУ-ну профессору Узлипат Гьасанова ва башгъалары дагъыстан тиллени оьсюв ёлларыны гьакъында оьзлени пикруларын айтды. Илму семинардан толу макъала газетни гелеген номеринде берилежек.

П.БЕКЕЕВА.