Алдагъы гюнлерде Каспийскиде Али Алиевни атындагъы спорткъаласында ябушувну кикбоксинг журасындан Россияда биринчиликни алмакъ учун юрюлген ярышлар тамамланды. Ябушувну эсгерилген журасындан Темиркъазыкъ Кавказда биринчилей Дюньяны чемпиону болгъан Али Порсукъону эсделигине багъышлангъан шо ярышларда 18 йыл чагъына етишмеген 2 мингден де артыкъ уланлар ва къызлар тогъатартды. Ачыкълашдырып айтгъанда, беш гюнню узагъында, демек, май айны 18-ден тутуп, 22-не ерли юрюлген ярышланы барышында бизин уьлкени 76 регионундан гелген яш спортчулагъа кикбоксингни алты да тюрлю къайдасында 11 тюрлю авурлукъда оьзлени усталыгъын ва бажарывлугъун сынамагъа имканлыкъ берилди.
2002-нчи йылда вагьшиликни натижасында яшавдан гетген торайып гелеген яш уланлар бугюнлерде де оьзюне ошамагъа сюеген белгили спортчуну эсделигине багъышлангъан ярышлар артдагъы дёрт йылны ичинде мердешли кюйде оьтгериле. Шо ярышланы къурум комитетини ёлбашчысы, Дагъыстанны ябушувну кикбоксинг федерациясыны вице-президенти Тимур Порсукъов республика газетлени, оьзге маълумат къуралларыны мухбирлерине берген баянлыгъында билдирген кюйде, агъасыны эсделигине багъышлангъан ярышланы ортакъчылары оьзлени арасында 300 жут медалны есилерин мекенли этмек учун ябушув халчагъа чыкъгъан.
Ярышланы ачылывуна байлавлу шатлыкъ гьаракатда Дагъыстанны физкуль-турагъа ва спортгъа къарайгъан министрини 1-нчи заместители Зайнал Салавутдинов, Россияны ябушувну кикбоксинг федерациясыны генеральный секретары Владимир Филатов, олай да Дагъыстанны ябушувну кикбоксинг федерациясыны президенти Магьаммат Магьамматов ва кёп оьзгелери ортакъчылыкъ этди.
Инг алда Къалмукъ Республиканы башчысы, Россияны кикбоксинг федера-циясыны советини председатели Бату Хасиков ярышланы ортакъчыларына йиберген къутлав кагъызын Владимир Филатов жыйылгъанлагъа малим этип сёйледи:
– Бугюнлерде оьтгерилеген ярышлар савлай уьлке учун да артыкъ агьамиятлы. Яшлар ва яшёрюмлер къуршалгъан спортну гьар тюрлю жураларын оьсдюрюв торайып гелеген яш наслуну инамлы кюйде яшавда тюз ёлну танглавгъа болушлукъ этеген къурал гьисапда къалып тура. Шо гьакъда айта туруп, ярышлагъа къуршалгъанланы санавун гьисапгъа алгъанда, спортну гьар тюрлю журалары булан машгъул этивге байлавлу агьамиятлы масъалаларын чечивге шартлар яратагъанын эсгермеге бажарыла.
Артыкъ агьамияты булангъы агьвалат оьзюнден чыкъгъан спортчуланы гьаракаты макътавгъа лайыкълы республикада юрюле. Олар оьр даражада юрюлеген ярышларда кёп санавдагъы медаллагъа лайыкълы болуп геле. Дагъыстан Республика гьар заманда да йимик тийишли даражада къонакъланы къабул этип, бизин бары-бызны да гьайран этежегине гьакъ юрекден инанаман. Неге тюгюл, бугюнлерде республика савлай Россияны оьлчевюнде туристлер артыкъ иштагьланагъан гьайран табиаты, кёп миллетли халкъларыны оьзтёрече маданият мердешлери булангъы ер гьисаплана.
Бизин республиканы оьр гьакимлик къурумларыны атындан ярышланы ортакъчыларын ва гелген къонакъланы Зайнал Салавутдинов къутлап сёйледи.
– Шу агьамиятлы ярышлар Дагъыстан Республикада биринчилей юрюле ва оьзюню атын данггъа чыгъармагъа бажаргъан белгили спортчу Али Порсукъовну эсделигине багъышланып оьтгериле. Бизин республикада бирге-бир тутушуп ябушувгъа, олай да ябушувну оьзге жураларына гьар заманда да таман чакъы тергев берилген. Спортну шо журалары булан машгъул болагъан дагъыстанлы кочаплар Олимпия оюнларда, Дюньяны ва Европаны чемпионатларында, башгъа тюрлю турнирлерде бир тюгюл, кёп гезиклерде алдынлы ерлеге лайыкълы болуп, тувуп оьсген ерини ва элини атын данггъа чыгъаргъан.
Шолай, кикбоксингде де мекенли оьрлюклеге етишмеге бажаргъан спортчулар да аз тюгюл. Россияда алдынлыкъ алмакъ учун кикбоксингден ярышланы бизин республикада оьтгерив де дагъыстанлылар спортну шо журасына некъадар тергев берип гелегенине шагьатлыкъ эте, – деди ол.
Оьзюню гезигинде Тимур Порсукъов Россияны кикбоксингге къарайгъан федерациясына бизин уьлкени оьлчевюнде алдынлыкъ алмакъ учун юрюлеген ярышланы къабул этмеге ихтияр берилгенине байлавлу разилигин билдирди. Шону булан бирге, ол оьзюню сёйлевюнде Дагъыстанны Гьукуматы ярышланы оьтгеривню сиптесин якълагъанын да уллу гьюрмет булан эсгерди.
Ярышланы оьлчевюнде оьтгерилеген тогъатартывлар 8 тюрлю ябушув майданчада юрюлюп турду. Ярышланы финал тиретинде Дагъыстанны, Мычыгъыш Республиканы, Темиркъазыкъ бойларда ерлешген регионланы, Красноярск крайны, Алтайны, Ингушетияны, Москва шагьарны жыйым командаларына къуршалгъанлар лап да кёп алдынлы ерлеге ес болду. Алтын медалгъа лайыкълы болгъанлагъа ярышларда биринчи ерни алгъанын белгилейген хас белбавлар да тапшурулду. Шондан къайры да, бу ярышларда уьстюнлюклеге етишген спортчулар гележекде халкъара турнирлерде ортакъчылыкъ этеген Россияны жыйым командасына къуршалажакъ.
Насрулла БАЙБОЛАТОВ.
