Дагъыстан Республиканы Башчысы Сергей Меликовну май айны 29-нда этген Чакъырывуна гёре Буйнакск районну башчысы Уллубий Ханмурзаев булай баянлыкъ бере:
«Республикабызны Башчысы С. Меликов шо гюнгю чараны Украина бойда юрюлеген хас асгер гьаракатны ортакъчыларына кёмек этивден, тергев болдурувдан башлагъаны нечакъы бола буса да яхшы. Бизин гьай этивюбюз олар учун, гертиден де, уллу савгъат болуп гёрюне. Буйнакск райондан минглер булангъы жагьил уланлар, олар булан бирге къызлар да, кёп сюеген агьлюлерин де къоюп, ана Ватаныбызны аманлыгъын сакълап, къоччакълыкъны уьлгюлерин гёрсетип туралар.
Республиканы Башчысы оланы гьаракатына къыймат бере туруп, «Бизин заманыбызны игитлери» деп ташдырагъаны да негьакъ тюгюл. Сергей Алимович Чакъырывуну барышында дагъыстанлыланы яшавлукъ шартларын бир къадар яхшылашдырмакъ муратда яшавгъа чыгъарылгъан ишлени ва кютюлме герек гёз алгъа тутулгъанларыны гьакъында тёкмей-чачмай айтды. Ватандашланы оьрчюген масъалаларын тюзевлю чечив пачалыкъ борчланы аслу бёлюгю санала. Шону гьисапгъа алып, онгайлы яшавлукъ шартлар яратмакъ, гьар адам да ес болма болагъан сан янлы билимлер ва медицина якъдан къуллукъларын кютюв – шо программаны агьамиятлы бёлюклери. Ондан къайры да, энергетиканы тармагъына, топуракъ байлыкъланы ёрукълу къоллавгъа, адамланы сув булан таъмин этивге, табиатны къорув ва туризмни оьсдюрюв тармакълагъа да тийишли агьамият берме гереги эсгерилди.
Республиканы Башчысы оьзюню Чакъырывунда кёп яшлы агьлюлени якълавгъа этилме тюшеген тергевню гьакъында айрыча эсгерди. Дагъыстанлыланы яшавлукъ шартлары гьар-бир ягъындан терен кюйде гёзден гечирилип, бир-бир кемчиликлени алдын алывну мекенли ёллары белгиленди.
Мени гьисабымда, Республиканы Башчысы Сергей Алимович арагъа чыгъаргъан янгы ойланы, таклифлени уьстюнде тындырыкълы ишлегенден сонг бизин элибиз яшамакъ учун да, ял алмакъ учун да кёп онгайлыкълары булангъы инг яхшы ерлени бирисине айланажакъ. Биз де оьз ягъыбыздан алдыбызгъа салынгъан борчланы тайышывсуз кюйде яшавгъа чыгъарма къаст этербиз.
Гьазирлеген Гюлзар КАЗИМОВА.
