Бизин республиканы милли политикагъа ва динлени масъаларына къарайгъан министрлигини сиптечилиги булан бугюнлерде тыш уьлкелерде яшайгъан дагъыстанлыланы халкъара форуму оьтгерилди. Ачылашдырып айтгъанда, август айны 6-сындан тутуп, 9-уна ерли давам этилген шо гьаракатда гьар тюрлю тармакъларда мекенли оьрлюклеге етишмеге бажаргъан 30 тыш пачалыкъда яшав къургъан 100-ден де артыкъ адам оьзлени ортакъчылыгъын болдурду. Да-гъыстанны гьакимлик къурумларындан къайры, мердешли кюйде уьчюнчюлей оьтгерилген шо форумну асувлугъун артдырывгъа уьлкени оьлчевюнде де таман даражада тергев берилди.
Шо гьакъда айта туруп, форумну ишинде Росссияны тыш ишлер министрилигини, СНГ-ни ишлерине къарайгъан федерал агентлигини, олай да оьзге пачалыкъ къурумланы ва жамият бирлешивлени вакиллери де ортакъчылыкъ этип, оьтгерилеген агьвалатны агьамиятлыгъын исбатлады. Бу йыл Дагъыстанны халкъ шаири Русул Гьамзатов тувгъанлы 100 йыллыгъы белгиленеген гюнлеге расландырылгъан форум дюньяда парахатлыкъны белгиси болуп токътайгъан кюйде гьар тюрлю уьлкелерде яшайгъан дагъыстанлыланы бирикдиривге ва сыкълашдырывгъа багъышланып юрюлдю.
Итнигюн, август айны 7-нде, эсгерилген форумну шатлыкъны шарт-ларында ачылывуна байлавлу жыйын башлангъангъанча жыйылгъанлагъа «Россия – мени тарихим» деген паркда бизин республиканы халкъ саниятчылыкъны усталары этген гьар тюрлю алатланы, олай да машгъур шаирлени ва язывчуланы къаламындан чыкъгъан китапланы выставкалары булан таныш болмагъа имканлыкъ берилди. Расул Гьамзатовну яшав тархларын ачыкъ этеген выставка да оланы айрыча тергевюн тартды. Дагъыстанны Башчысы Сергей Меликов ва Россияны Президентини Аппаратыны ёлбашчысыны заместитили Магьамматсалам Магьамматов да шо выставкалар булан таныш болду.
Оьтгерилген жыйынны барышында Магьамматсалам Магьамматов Россияны Президенти Владимир Путинни форумну ортакъчыларына йиберген къутлав къагъызын малим этди. Эсгерилген шо кагъыздан белгили болгъан йимик, уьлкени ёлбашчысы Магьачкъалада оьтгерилген тыш пачалыкъларда яшайгъан дагъыстанлыланы къуршайгъан форумгъа уллу агьамияты булангъы агьвалат гьисапда янашгъан.
Оьтгерилеген форум уьлкеден тышда яшайгъан бизин якълылар булан гьар не якъдан да байлавлукъланы беклешдирмек учун себеплер яратажагъына инанагъаны гьакъда айтгъан.
Шондан сонг, М. Магьамматов бизин республикада кёп миллетлени, динлени вакиллери яшайгъаны гьакъда айта туруп, Расул Гьамзатов тенглемеге тенги ёкъ кюйде адабият варислигин къоюп гетгени гьакъда сёледи.
Оьзюню гезигинде Сергей Меликов да артдагъы вакътилерде бизин якълылар тыш пачалыкъларда уьлкени оьлчевюндеги масъалаланы чечивде аслам къошум этип гелегенин ташдырып сёйледи. Ону сёзлерине гёре, бизин республиканы ёлбашчылары тыш пачалыкъларда яшайгъан дагъыстанлылар булан бир де байлавлукъну уьзмеген ва шону беклеш-диривге агьамият берип геле. Бизин республиканы гьукуматыны сиптечилиги булан 2021-нчи йылда тыш пачалыкъларда яшайгъан дагъыстанлыланы якълавгъа байлавлу закон къабул этилгени де шону герти кюйде исбатлай. Кёп миллетли халкъыбызны бай тарихи варислиги, олай да республиканы табиатыны имканлыкълары булан янгыз дагъыстанлыланы тюгюл, савлай уьлкени де оьктем болма гьакъы бар. Тарихи ва маданият варислигибизни гьакъында оьзгелеге де билдирмек тыш пачалыкъларда яшайгъан дагъыс-танлыланы аслу борчларындан бириси болуп токътамагъа тюше.
Оьтгерилген форумну оьлчевюнде артындагъы гюнлерде Магьач-къалада ва Дербент шагьарда жыйынлар, «дёгерек столну» айланасында пикру алышдырывлар юрюлюп турду. Оланы барышында оьзге регионларда, тыш уьлкелерде яшайгъан оьзлени якълылары булан байлавлукъ юрютюв тармакъда топлангъан сынав малим этилди. Шону булан бирге, гьар тюрлю тыш пачалыкъларда яшайгъан дагъыстанлылар булан байлавлукъланы гележекде беклешдиривню ёллары арагъа салынып ойлашылды. Гелген къонакълагъа бизин халкъланы тарихи, маданияты, йыр байлыгъы булан ювукъдан таныш болмакъ учун республиканы юртларына ва шагьарларына сапар чыкъмагъа да имканлыкъ берилди.
Насрулла БАЙБОЛАТОВ.
