Бир жыйынны – 4 масъаласы

ДР-ни Башчысы Сергей Меликов жуманы башында оьтгерген жыйында бугюнлерде аслу деп гьисап этилеген 4 масъалагъа къаралгъан. Жыйын­ны башлагъанча ол Москва областда болгъан жинаятчы ишни ва дагъыс­танлылар болгъан ишге къайгъырагъанны гьакъында айтгъан.

 

Белгород областда Украина якъдан болгъан атышывланы натижасында кёп яшавлукъ биналар зараллангъан, янгыдан атышыв болар деген къоркъунчлукъ да таймагъан. Шону учун да Дагъыстанны Башчысыны таклифи булан республика шо бойдан 500 яшны къабул этме болагъанын билдирген.

Жыйында сёйлеген Дагъыстанны Гьукуматыны башчысыны орнунбасары Муслим Телякъавов билдирген кюйде, яшланы ва оланы ата-аналарын лагерлерде, школа-интернатларда ерлешдирмек учун ерлер гьазир экенни айтгъан. Оюнчакълардан башлап, охув-языв алатлагъа ерли топлангъан, къошум билим алмакъ учун имканлыкълар болдурулгъан, медицина къуллукъчулар, психологлар, оланы республиканы тамаша ва гьайран ерлерине геземе элтмек учунгъу адамлар да белгиленген. Шо ишлерде инсаплы фондлар этген кёмеклер де айтыла.

Адамланы арзларына къарайгъан масъалагъа гёре сёйлеген ДР-ни Башчысыны ва Гьукуматыны председателини администрациясыны башчысы Алексей Гьасанов уьч айны ичинде адамлардан 3900 арз болгъанны айтгъан. Шолар да – энергетика, билим берив, къурулуш, загьмат ва яшавлукъ оьсювю, савлукъ сакълав министерликлени ишлерине гёре этилинген арзлар. Шо арзланы кёбюсю ерлерде ачыкълыкъ, ватандашлар булан байлавлукъ осал экени булан байлавлу. Ерли гьакимлик бары да масъалалагъа гёре анг­латывлар бере турмаса, адамлар маълуматланы тергелмеген Интернетни торундан таба ала.

Муниципал къурулувланы, юртланы ва территорияланы дазуларын мекен-лешдиривню гьа­къында ДР-ни топуракъ ва мюлк аралыкъ министри  Завур Эминов боянлыкъ берген. Ол билдирген кюйде гетген йыл кёп иш этилген, бу йыл да 717 яшавлукъ ерлени аянлашдырмагъа герек. Бир-бир муниципалитетлер шо ишни башлама да башламагъанлар, шо ишлеге деп гёрсетилген акъчаланы алма да алгъасамайлар. Кадастр ишлер де давам этиле, бугюнлерде 30 районда ва шагьарларда 160 минг имаратны гьисапгъа алынмакъ учун ишлер юрюле.

Промышленность ва сатыв-алыв министр Низам Халилов билдирген кюйде, 2015-нчи йылдан берли базарланы санаву 70 процентге кемиген. Шо да ихтиярсыз къурулгъан базарланы тергемек учун къурулгъан комиссияны ишини гьасиллери бола. Артда тергелген 47 базарны ичиндеги 18 минг сатыв ерден 7 минги тюгюл гьисапгъа алынмагъан.  Оьтген сентябр айдан февраль болгъанча, шолардан 980 далапчы гьисапгъа салынгъан.

Гётерилген масъалалагъа гёре тапшурувлар бере туруп, С.Меликов Рамазан айны ичинде Дагъыстангъа ислам пача­лыкълардан алимлер гележекни, олар бусурманланы сыйлы ерлерине барма гёз алгъа тутгъанны, оьзю буса оланы гьюрметине ифтар этежекни де айтды.

 

Г. БЕК.

 

Авторизация
*
*
Регистрация
*
*
*
Согласны с условиями сайта?
Генерация пароля