Ватанына гьалал къуллукъ этеген, тийишли болгъанда къолуна савут алып Ватанын якъламагъа гьазир турагъан, бюдюремейген болат къашлы уланлар кёп бар. Украинада юрюлеген хас асгер гьаракат башлангъанлы да шогъар шеклик этеген гиши ёкъдур.
Буйнакск районну Атланавул юртунда да эсгерилген асгер гьаракатда ортакъчылыкъ этеген къоччакъ уланлар кёп бар. Оланы арасында хас асгер гьаракатны биринчи гюнлеринден башлап уьч къурдаш – уьч къоччакъ–Ибрагьим Къоркъмасов, Алибек Абсаматов, Ирбайын Акъаев Ватанын якъламагъа гьазир тургъанлар. Олар уьчюсю де бир экипажда, «Акация» деген артиллерия установкада оьзлени алдына салынгъан асгер тапшурувланы оьр даражада кютюп тургъан. Уьч де уланбу йыл феврал айда къысгъа болжалгъа ял алмагъа агьлюсюн, дос-къардашын гёрмеге гелип де гетдилер. Шо вакътиде олар Атланавул орта школагъа чакъырылып охувчу яшлар булан да ёлукъдулар. Къоччакъ асгер къурдашланы хабарлары, къатты ругьу оьсюп гелеген яш наслуну патриот ругьда тарбиялавгъа шайлы къошум эте. Дос-къардашы, къурдашлары ва башгъалар шо замангъы ёлугъувлар олар учун ахырынчы ёлугъув болар деп бир де ойлашмагъандыр…
Отпускасы битген сонг олар асгер тапшурувланы кютмеге давам этмек учун къуллукъ этеген бёлюгюне къайта. Къайтывунда Донецк Халкъ Республиканы Авдеевка шагьарыны боюнда юрюлеген къагьрулу урушларда ортакъчылыкъ эте. Июн айда буса Запорожский областда Любимовка деген посёлокну ювугъунда оьзлеге берилген тапшурувланы тындырыкълы кюйде яшавгъа чыгъарып дав этелер. Июн айны 22-нде асгер экипажны къайтып Донецк бойгъа, Старомайорск юртну ювугъуна бакъдыра. Шонда душманны атышывларыны натижасында бир-биринден айрылмай Ватанына къуллукъ этеген уланланы яшаву къыркъыла, олар къоччакъ кюйде жан берелер. Хас асгер гьаракатны вакътисинде гёрсетген къоччакълыкълары учун уьч де къурдашлар – Ибрагьим Къоркъмасов, Алибек Абсаматов ва Ирбайын Акъаев Къоччакълыкъны орденлерине гёрсетиле.
Игит къурдашланы гьакъында Ибрагьим Къоркъмасовну къызардашы Марьям Ханмурзаева оьзюню эркъардашын эсгере туруп булай хабарлай:
–Ибрагьим оьзюню фамилиясына амин, бюдюрейген, къоркъувну билмейген къатты улан эди. Ону игитликлерини, къатты хасиятыны гьакъында китап язма да ярай. Ол давну ал сыдраларында болса да бизге, дос-къардашларына къыйынлыкъланы гьакъында бир де кант этмеген. «Бары зат яхшы болажакъ, Марьям къыйналма» деп мени де гёнгюмню алып тура эди. Озокъда, къызардашны юреги авуртмай, къыйналмай боламы, нечакъы да къыйнала эдим, аявлу амалымны сагъына эдим. Ол къайда буса да, хас асгер гьаракатны лап къызгъын ерлеринде болса да уьйдегилени барын да байрамлар, тувгъан гюнлерибиз булан къутламагъа, тергемеге унутмай эди. Ачыкъ ва бир заманны ичинде къатты юрекли, бою-сою исбайы, иржайгъан юзлю, намуслу ва асил къылыкълы Ибрагьим амалымны таныгъанлар тап шолай эсгере ва даимге шолай эсибизде де къалажакъ, деп айталар
– Ол отпускагъа гелгенде уьйде бир гюн де артыкъ къалмай эди. Асгер къурдашларым къаравуллай, деп къайтып гетмеге алгъасай эди. Бизин уллатабыз Къоркъмас Умалатович Къоркъмасов да Уллу Ватан давну ортакъчысы–башындан ахырына ерли дав этген. Ол уллатабыз булан даим оьктем бола эди, огъар ошамагъа, ону игитликлерине лайыкълы болмагъа къаст эте эди. Гьали буса биз оьзю булан оьктем болабыз ва бир заманда да ону къоччакълыгъын унутмажакъбыз. Ол мени учун Яратгъаныбызны бир савгъаты йимик эди. Ял алмагъа гелген къысгъа 10 гюнюню барын да агьлюсюне, дос – къардашларына бютюнлей багъышлай эди.
Ибрагьим Къоркъмасов 1991-нчи йылда Атланавул юртда тувгъан. Орта школаны битдирген сонг оьр охув ожакъгъа тюшюп билим де алгъан. 2010-2011-нчи йылларда Тюмень областда асгер борчун кютюп къайтгъан. 2013-нчю йылда асгерлик чалышывун Буйнакск шагьардагъы мотострелковый бригадада башлагъан. 2017, 2018, 2021-нчи йылларда Сирияда къуллукъ этген. 2015-нчи йылдан берли ол асгер гьаракатланы ветераны да дюр.
2023-нчю йылда Суворовну атындагъы ва «Давда айрыча гёрсетгени учун» деген медаллар булан савгъатлангъан.
Ибрагьим Къоркъмасовну ата-анасы, агьлюсю ва эки авлети къалгъан.
Бир юртну уьч къоччагъы ва оланы игитликлери гележек наслугъа уьлгю болажакъ. Дос-къардашыны юрегинде, юртлуларыны, ватандаш-ларыны эсинде даимге къалажакъ.
Патимат БЕКЕЕВА.
