Апрель айны 23-нде полицейскийлер 30 йыллыкъ ерли адамны тутгъанлар. Ол гьар тюрлю макюрчюлюк къайдалар булан сакъат къызъяшны квартирин оьзюню атына яздыртып, 5 миллион манатгъа сатгъан ва акъчаны оьз пайдасына къоллагъан деп айыплана.
* * *
Апрель айны 23-нде Буйнакск шагьар судда эки жагьил адамны уголовный ишлерине къаралгъан. Олар гетген йылны декабр айыны 24-нде шагьарны лап уллу майданында байрамгъа салынгъан ёлканы яллатма къарагъан болгъан. Суд экевюн де шарт булан 1,6 йылгъа эркинликден магьрюм этмек деген къарар чыгъаргъан.
* * *
Апрель айны 23-нде Сергокъала районну Мургук деген юртунда 50 йыллыкъ ерли адам эсирген кююнде агъасына гелип, ону булан эришмеге башлагъан. Уллусу чыдап болмай, гиччисине бичакъ уруп яралагъан. Ол азарханагъа тюшген. Ахтарывлар узатылып тура.
* * *
Апрель айны 22-нде Янгы Хушет посёлокдагъы онгача уьйлени бирисинде газ атылгъан. Натижада эр-къатын яралангъан ва азарханагъа етишдирилген.
* * *
Апрель айны 21-нде «Буйнакск-Къызылюрт» ёлну 27-нчи чакъы-рымында «ГАЗ» маркалы машинни 30 йыллыкъ гьайдавчусу, ёл низамны бузуп къаршы гелеген «КамАЗгъа» бетге-бет урунгъан. Енгил машинни гьайдавчусу гечге таба Буйнакск шагьар азарханада оьлген.
Оьтген гюнлени гёзден гечиргенде республикада 1-нчи апрелден тутуп, 14-нчю апрелге ерли гюнлер лап къоркъунчлу болуп токътагъан. 73 ёл хатабалагьда 15 адам оьлген, оланы 3-вю яшлар, 125 адам яралангъан, яралангъанланы арасында да 21 яш бар.
* * *
Россияны Ахтарыв комитетини Дагъыстан ахтарыв управлениеси Цунта районну Хутрах юртунда болгъан къайгъылы агьвалатгъа байлавлу уголовный иш ачгъан. Уллулар тергевсюз къойгъан «УАЗ-ны» ичине 5–6 йыллар болагъан къызъяшлар гирип, ойнамагъа башлагъан. Машин бирден оьзлюгюнден тербенип гетип, тик ерде къакъагъа тюшген. Гиччипавланы бириси шо ерде оьлген. Ону къурдашларына гьали врачлар болагъан кёмегин этмеге къарай.
* * *
Полицейскийлер Къаягент районда турагъан 27 йыллыкъ жагьил адамны тутгъанлар. Ол Первомайскоедеги ва Къаранайавулдагъы фермалардан 160 минг манатгъа токътайгъан 6 къойну урлап, Магьачкъаладагъы базарда сатгъан деп айыплана.
Алав Алиев.
