Намарт немис-фашистлер сююмлю Ватаныбызгъа чапгъын этгенде уьлкебизни бары да загьматчылары йимик, бизин районлу эренлер де совет элибизни душманлардан сакъламакъ учун фронтгъа гетген. Ватанына къыйынлы гюн гелгенде дав майданларда жанларын къурбан этгенлени, игитлик гёрсетгенлени, бирлери зайып болуп, эсен-аман къайтып, къайратлы загьмат тёкгенлени де бир де унутма ярамай. Оланы гьарисини гьакъында айрыча эсгерсе де кёп болмас.
Уллу Ватан давну ветераны, Уллу Ватан давну ордени, «Къоччакълыгъы учун», «Кавказны якълагъаны учун», «Уллу Ватан давда Германиядан уьст болгъаны учун» ва «Совет халкъ давда уьстюн гелгенлигини 60 йыллыгъы» деген медаллагъа ес болгъан, кёп къыйынлыкълардан оьтген, ажжалгъа бетге-бет турса да бюдюремеген Алим Матакъов шолайланы бири болгъан.
А. Матакъов 1912-нчи йыл Хамаматюртда тувгъан. Дав башлангъанда ол район военкоматдан таба чакъырылып фронтгъа гете. Ону аты Магьачкъала шагьарда 2011-нчи йылда чыгъарылгъан «Ватанны солдатлары» деген Эсделик китабына да гийирилген.
Алим Матакъов давдан сонггъу йылларда районда юрт хозяйствону аякъгъа тургъузувда да аслам къошум этген. Ол гьар-бир йылларда Хамаматюрт, Гьасанай, Люксембург, Чаландар юрт колхозларда председатель болуп ва оьзге тюрлю къуллукъларда да ишлеген.
Район газетни 2022-нчи йылда 35-нчи номеринде чыкъгъан «Ленинни атындагъы колхозда» деп баш салынгъан тарихи макъалада булай деп языла: «Колхозну бригадири, ВКП (б)-ни члени ёлдаш Мамашев Зияв оьзюне тапшурулгъан 147 гектаргъа гюзлюклер чачып, 66 гектар участкасыны мамугъун жыйып, 43 гектар ердеги гьаби — жайын гесип, ташып ва арчып битген, бригадир, ВКП (б)-ни члени Матакъов Алим де оьзюне тапшурулгъан 147 гектаргъа толу кюйде чачып битген», – деп эсгериле.
Алим Матакъов къайсы касбуда чалышса да, оьзюн ишине берилген, низамлы адам гьисапда гёрсетген. Ону уланы Мутай, кёп йыллар Бабаюрт районну ич ишлер бёлюгюнде ГАИ-де ишлеген, гьали пенсияда ял ала.
«Атабыз ишине оьзтёрече янашагъан бек низамлы, артыкъ хабары да ёкъ, къатты адам эди. Бизин булан лакъыр этегенде де ол бир-эки сёз булан тийишли жавап берген сонг, дагъы гьеч сёйлемес эди, биз де огъар дагъы зат сорап турмакъны маънасы ёкъ экенни англай эдик. Арадан заман гетип, атам гечинген сонг да, ону булан бирге ишлегенлер айтып, къайратлы загьматы, ишде етишген уьстюнлюклери гьакъда биз де билмейген кёп маълуматлар аян болду», – дей ол бизин булангъы ёлугъувда.
Къыйынлы йылларда, уллу къоччакълыкълар ва игитликлер гёрсетген адамланы эсге алып, олагъа гьакъ юрекден даим гьюрмет этебиз. Оьзлерден сонггъу наслулагъа парахатлыкъны, насипли яшавну, гележекге инамлыкъ берген давну ортакъчыларына абурсый этмек бизин ва гележек наслуну аслу борчу болуп токътай.
Асият МЕТЕЕВА,
Бабаюрт
СУРАТДА: Алим МАТАКЪОВ.
