Гьали-гьалилерде Минскиде тракторлар чыгъарагъан уллу заводну бир нече жаваплы вакиллери ишчи сапар булан Къазанышдагъы шо цехге гелип гетди. Оланы арасында «Минский тракторный завод» деген ачыкъ акционер жамиятыны сервис ва техника экспертизагъа къарайгъан управлениесини начальнигини заместители Александр Барташевич, СНГ-ге гиреген уьлкелерде техника сервисни къурувгъа байлавлу бёлюгюню начальниги Алексей Глиняний, шо заводну ич тергевлерини къуллугъуну начальниги Нила Ильющенко, «МТЗ – Ставрополь сатыв-алыв ожагъы» деген идараны генеральный директоруну 1-нчи заместители Дмитрий Шибитов йимик ёлдашлар бар эди. Олар Шерифулланы цехиндеги бирге иш гёрювню гьакъындагъы разилешивге къоллар да салды.
Уьстевюне, энни мунда, демек, Буйнакск районда Минскидеги трактор заводну атындан дилер центры да ачылды. Шону яхшылыгъындан гьалиден сонг запас алатлар ахтара туруп, Дагъыстандан тышгъа чыгъып айланып авара болма тюшмежек. Неге тюгюл, Къазанышда къайсын сюйсенг тракторну ярашдырып онгарма бажарылажакъ.
Минскидеги заводну вакиллери мундагъы цехде ишлер салынгъан кюйню гёрюп оьзлер бек тамаша ва рази болгъанны билдирдилер. Савлай Россияда бар шулай 9 цехни арасында Къазанышдагъы лап яхшы къыйматгъа лайыкълы экенни де айрыча эсгердилер. Шерифулла жигерли специалист экенге мюкюр болуп, ону булан инанып иш тутма ярайгъанны англатдылар.
Байлангъан дыгъаргъа гёре лап ювукъ вакътини ичинде Буйнакск райондан Минскидеги трактор заводгъа ишге тюшюнюп гелмеге адамлар бакъдырылажакъ. Оьзю Шерифулла буса о заводну хас вакили йимик ихтиярлары булангъы дилер гьисапда белгиленежек. Шоллукъда, энни янгыз Дагъыстандагъылар тюгюл, Мычыгъышдагъы, Къамчайдагъы (Ингушетия), Осетиядагъы ва Къалмукъ элдеги механизаторлар да оьзлени «Беларусь» тракторларына запас алатланы алмагъа, шоланы тюпден-ерден (капитал ремонт) ярашдырмагъа болажакълар.
Ш. Акаев айтагъан кюйде, оьзюню центрында этилеген къуллукълагъа чыгъагъан харжлар Минскидеги заводда йимик тенг болажакъ. Сонг дагъы да бу центр Ставропольдагъы МТЗ сатыв-алыв ожагъы булан да тыгъыс кюйде къатнап иш гёрежек.
Буйнакск районну гьакимияты гьаракатчы улан Шерифулланы пайдалы сиптелерин ва ишлерин гьар-бир якъдан арив гёре ва якълай. Районда булай ожакъдан районну бюджетине налог къошумлардан къайры да, 150 гишиге сама иш ерлер болажакъ.
Берекетли ишни башланыву саялы бир дагъыстан эсделик болсун учун, Шерифулла Акаев къонакъланы барысына да кубачи (гюбеги) усталар этген сувенир – хынжаллар савгъат этди.
Абдулла БУГЛЕНЛИ.
