Алдындагъы гюнлерде, физкультурниклени байрамыны алдында, Хумторкъали райондагъы «Алдынлыланы гьаракаты» деген ерли бёлюгюню, райондагъы физкультураны ва спортну управлениесини, яшланы ва оьрюм яшланы спорт школасыны сиптечилиги булан яш спортчулар аты айтылгъын профессионал боксёр ва тренер Артур Бочуев, тутушуп ябушувну тренери Гьусейн Салаватов булан ёлугъув оьтгерген.
Яшлар чакъырылып гелген къонакълагъа берген кёп соравланы арасында «Спортда уллу уьстюнлюклеге етмек учун не этмеге герек?» – деген соравгъа А. Бочуев булай жавап берген: «Спортда уллу уьстюнлюклеге етишмек учун, инг башлап, низамны сакъламагъа герек. Низам янгыз спортда болуп къалма тюшмей, адам яшавда бары да янындан низамлы болма тюше. Школада – охувунгда, намаз этегенлер – заманында, гечикмей намазын этмеге – гьасили, низам болмаса, бир ишинг де алгъа гетмей».
«Алдынлыланы гьаракаты» деген ерли бёлюгюню председатели Жалалутдин Закарьяев гележекде яшланы белгили спортчулар булангъы ёлугъувларын чакъда-чакъда оьтгерсе, яшёрюмлени спортгъа бакъгъан якъдагъы гьасиретлигин бирден-бир гючлендирмеге бола, – деп эсгерген.
Жават ЗАКАВОВ.
