Ярыкъ ва ниъматлары кёп дюньягъа яралып, оьмюр сюреген къысгъа болжалыны ичинде, инсан сююп де, сюймей де нечесе тюрлю къыйынлыкълагъа, къоркъунчлу гьаллагъа тарымайлы къалмай. Шолай гезиклерде инсанны балагьлагъа къаршы турма гьазирлиги бары яда ёгъу, мунаман деп нече де арив билине.
Буйнакск районну Капиркъумукъ юртунда яшайгъан Агьмат ва Нурият Мусаевлени агьлюсюнде 1990-нынчы йыл тувуп оьсген, тарбия-билим алгъан уланы Муса, къысмат буюруп яшавуна рас гелген къайгъыланы гётерип, енгилмейли, ругьдан тюшмейли алгъа абат алып уьйренген. Ол ата юртундагъы орта школаны 11 класын охуп битдирген сонг, машин гьайдавчуланы къысгъа болжаллы курсларын да тамамлай. Узакъ къалмай Муса асгерде къуллукъ этме чакъырыла. 2015-нчи йыл ол оьзюню гележекдеги яшавун бюс-бютюнлей асгер къуллукъчуну жаваплы ва абурлу касбусу булан тыгъыс кюйде байлама токъташа. Ставрополь крайда асгер бёлюкдеги вакътисинде контракт язып юрегине тутгъан мурадына да етише. Бир болжалы битгенде Буйнакск шагьарда ерлешген асгер бёлюкде къуллугъун кютме чыгъарыла.
Украина бойда юрюлюп турагъан хас асгер гьаракатгъа да ол биринчи гюнлеринден тутуп къуршалгъан ва оьзюне тапшурулгъан асгер борчланы тайышывсуз кюйде яшавгъа чыгъарма гиришген. Асгерде къуллукъ этив касбусунда яхшы сынав топлагъан, яш чагъындан тутуп спортну тюрлю журалары булан машгъул болуп оьсген Муса, асгер ёлдашларыны инамлыгъын, командирлерини де разилигин къазанып иш юрюте.
Асгер къуллукъгъа, борчларына къаны-жаны булан берилген, не йимик четим гьаллагъа тюшсе де тартынывсуз чыгъагъан къумукъ уланны гьаракатына тийишли къыймат берип, Мусаны савгъатгъа гёрсетелер. 2022-нчи йыл 21-нчи июлда Россияны Президенти В.В.Путинни Указы булан Украина бойда юрюлеген хас асгер гьаракатда къоччакълыкъны уьлгюлерин гёрсетеген Муса Агьматович Мусаев Жуковну медалына лайыкълы бола. Ондан къайры да, Муса «За участие в спецоперации» ва «За боевые отличия» деген медаллар булан да савгъатлангъан.
Озокъда, асгер къуллукъчуну яшаву, ону гьар гюнлюк къайратлы ишлери, къоччакълыгъы булан бирге, ол лайыкълы болгъан пачалыкъ савгъатлар булан да оьлчене. Амма ата-аналары, дос-къардашлары ва агьлюлери учун оланы сав-саламат кюйде къайтмакълыгъы дюньяны бары байлыкъларындан да артыкъ.
Шолай, етишип гелген янгы йылны алдында гезикли къысгъа болжаллыкъ отпускагъа йиберилип гелген Муса, анасы Нуриятны, юртдагъы яшлар бавунда тарбиялавчу болуп ишлейген агьлюсю Айишаны, уланлары Шаруханны ва Мугьамматны янында болуп ажайып сююндюрдю.
Ата юртдан, ана ожакъдан, ана Ватандан азиз болуп болагъан гьеч бир ниъмат, не де байлыкъ ёкъдур. Къысгъа болжалгъа гелген гюнлеринде Муса агьлюсю ва яшлары булан бирге яшав ёлдашы Айишаны ата юртунда болуп, дос-къардашы булан эсде къалар йимик къужурлу ёлугъувлар оьтгерип, арив ял да алып къайтдылар.
Казим КАЗИМОВ.
СУРАТДА: Муса Мусаев.
