Гебек КЪОНАКЪБИЕВ
Жинаятчылыкъны миллети болмай
Сайлавлар къавгъасыз, къалмагъалсыз ва аварасыз битгенге, шонда бирдагъы гезик де Россияны Президенти болуп Владимир Путин сайлангъангъа сююнгенибиз тайып да битгенче, 22-нчи мартда болгъан аччы хабар барыбызны да къайгъыгъа тарытды.
Москва областны Красногорск шагьарындагъы уьлкеде инг де уллу деп гьисапланагъан «Крокус Сити Холл» деген ерге ял алма, концертге къарама гелген минглер булангъы бир гюнагьсызлагъа къаршы этилинген вагьшилик, адамны гьакъылына сыйышмай. Артда билдирилген кюйде, алты жинаятчы савутлар булан залгъа гирип барагъан кюйде адамланы гюллелеме башлагъан. Сонг олар концерт залгъа гирип, минглер булангъы адамлагъа да атышгъан, сонг яллатагъан алатлар ташлагъан.
Натижада 139 адам гечинген, 200-ге ювугъуна зарал болгъан. Шоланы арасында яшлар да бар.
Бир-бир маълумат къуралларда жинаятчыланы миллетин излеп айланалар. Жинаятчылыкъны миллети, дини ва адамлыгъы болмай. Бу гезик де олар шону исбат этген…
Олар жазасыз къалмас, тек бир гьюнагьсыз ва рагьатланма гелгенлеге савутдан атышмагъа ва идараны яллатып, ичиндегилер гюйсюн, чиркисин деп этилинген жинаятчылыкъ — айтып битдирмесдей рагьмусузлукъ, оланы фашистлер булан тенг этме де ярай.
Террорчулукъ не экенни ва ону къайгъысын дагъыстанлылар эшитип билмей, олар нечесе адамланы къайгъыгъа тарытгъан, нечесе яшланы аявлу адамларындан, ата-анасындан айыргъан.
Интернетни торунда шо агьвалатгъа кёп тюрлю ойлар ва ёравлар айтыла: ич ишлени къуллукъчуларыны бир бёлюгю сама минглер булангъы адамлар жыйылагъан ерде токътамаймы, токътай буса неге чаралар гёрюлмеген? Жинаятчылагъа вагьши ишин де этип, заралсыз гетме нечик имканлыкъ болгъан? Озокъда, булай ва башгъа соравлагъа жаваплар табылажакъ. Табылып да тура.
Террорчулукъ – алдын алма инг де къыйын ишлени бириси, бары да ерни сакълама ва гьар адамны тергеме де бажарылмай. Кёп адам къошулуп этилеген террорчулукъгъа гьазирленмей оьтгерилмей. Шоланы алдын алмакъ учунгъу къуллукъдагъылар кёп иш этелер, кёбюсюн гьазирленивню вакътисинде туталар. Бу гезик….
Россияны Президенти В.Путин 25-нчи мартда оьтгерген генгешде гьалны толу кюйде суратлады ва шо кимге тарыкъдыр деген соравну берди.
–Бирлери шо вагьши ишни исламны якъчылары этген дей, шону да арап-исрайыл арадагъы дав агьвалатлар булан булгъама къарай, – дей Президент. – Мен гьисап этеген кюйде, шолар бусурманлар буса да, таза ислам динли адамлар тюгюл, дюр буса сыйлы Рамазан айда шолай вагьши ишни этмес эдилер. Ойларыбызны башгъа янгъа бурма герекбиз, неге тюгюл де террорчулар Брянск бойгъа да, шондагъы агъачлыкълардан Украинагъа багъып да негьакъ къачмагъан. «Крокусдагъы» иш адамланы къоркъутмакъ ва жамиятны ичинде пелекет салмакъ учун этилинген, тек бизин къоркъутма биревге де бажарылмажакъ.
Къайгъы бирикдире дейгени герти экен, шо къанлы агьвалатдан сонг уьлкени халкъы оьзлер къайгъырагъанны тюрлю-тюрлю чаралар болуп аян этди. Жинаятчыланы налатлады. Шо гюнлерде болгъан ишге де дагъыстанлылар юрегинден къайгъырдылар.
Террорчулукъ лам болду деп рагьат турма ярамай, шогъар къаршылыкъны биригип билдирме ва токътатмай юрютме герек. Шолай вагьшиликни алдын алмакъ учун барыбыз да, гьарибиз де тергевлю болма тарыкъбыз.
Оьлгенлени адамларына къайгъырышывубузну билдире туруп, олагъа чыдамлыкъ ва сабурлукъ, зараллангъанлагъа буса тезликде сав болмакъны ёрайбыз! Ингдеси, шо террорну гьазирлегенлер бары да аян этилип, тезде барысы да тийишли такъсырын аларгъа умут булан къалабыз.
