Бизин маълумат:
Дагъыстандагъы автомобиль транспортну ёллары 31,056 минг чакъырымлагъа ерли узатылгъан. Шоланы арасында 686,6 чакъырымы федерал ёллар санала, къалгъаны регион ва ерли къоллавдагъы ёллар.
Артдагъы уьч йылны ичинде Дагъыстанда 116 чакъырымдагъы ёллар ва шолай да 19 кёпюр къурулуп пайдаландырывгъа берилген. Шону булан янаша 1360 чакъырымны къуршайгъан ёлларда ва 22 кёпюрде ярашдырыв ишлер де оьтгерилген.
«Мени Дагъыстаным – мени ёлларым» деген проектни оьлчевюнде бизин республикабызгъа 2023-нчю йылгъа 2,6 миллиард манат субсидия харж гёрсетилген.
Ёл къурувчуланы касбу байрамыны гьюрметине Россияда октябр айны уьчюнчю къаттыгюнюнде гьар тюрлю шатлыкъ чаралар оьтгериле. Лап да лайыкълы къурувчулар материал ва ругь якъдан иштагьландырыла – олагъа гьюрметли атлар бериле, дипломлар, грамоталар ва акъча савгъатлар тапшурула. Савлай Россияда ёл къурулуш тармагъындагъы къуллукъланы кютюв булан машгъул болагъан 3 минге ювукъ идараларда 750 мингден де кёп касбучулар сыйлы борчларына намуслу кюйде янаша. Къурувчулар, инженер-техника къуллукъчулар, проектлени гьазирлейгенлер ва оьзгелери янгыртыв-ярашдырыв ишлерде гёрмекли натижалары къоллавчуланы рази къалдыра.
Россияда Дагъыстан оьзтёрече четим табии шартлары булангъы республика гьисапда танывлу.
– Ёлланы къуруп къоллавчулагъа пайдаландырывгъа берегенде яяв юрюйгенлеге ва гьайдавчулагъа тийишли онгайлыкъланы болдурув оланы аманлыгъы учун оьтгериле, – дей ДР-ни транспорт ва ёл къурулуш министерлигини башчысы Жамболат Салавов. – Низамлы юрюшню токъташдырылгъан талапларын бузмагъа биревге де изну берилмей. «Мени Дагъыстаным – мени ёлларым», «Асил ёллар – аманлыкъны ёллары» деген регион ва пачалыкъ оьлчевдеги проектлер де бизин республикабызда шону учун яшавгъа чыгъарылагъаны гьакъда унутмагъа тюшмей.
Ёл къурувчуланы етишип гелеген байрамы булан гьакъ юрекден къутлай туруп, бугюн бизге де олагъа савлукъ булан аманлыкъ ёрамакъ, ишинде оьрлюклер ёрамакъ къала.
Къ. КЪАРАЕВ.
