Айлана ягъыбызда ер юзюнде чакъны алышыныву, гьаваны гьалын токъташдырагъан алатларда иссликни гёртсетеген дражасы гьатдан озуп барагъаны къоркъунчлукъну тувдура. Гючлю алатопанлардан, явагъан буз бурчакъдан, сувдан ва от тюшювлерден сакъ болмасакъ, тас этивлеге ёл берилежек.

 

Бугюнлерде Дагъыстанны орманлыкъ комитетини жыйынлар залында оьтгерилген уллу производство генгешде эсгерилген тармакъны бары да жаваплы касбучулары, ерлердеги район ва шагьар хозяйстволаны вакиллери ортакъчылыкъ этдилер.

– Агъач байлыкъларыбызны от тюшювлерден къоруп сакъламакъ учун юрюлеген гьаракат бизин республикабызда гюн сайын гючлене, – деди генгешни ачгъан ва юрютген ДР-ни орманлыкъ хозяйствосуну башчысы Вагьап Абдулгьамитов. – От тюшювлени алдын алывгъа байлавлу англатыв ишлер, аманлыкъны чаралары низам талап этеген кюйде салынмаса, тас этивлени алдын алмагъа четим. Айтмагъа сюегеним, Россияны агъач байлыкъларын къоруп сакълавгъа ва асувлу кюйде пайдаландырывгъа бакъдырылгъан законларына гьюрметли кюйде янашыв – бугюнню аслу масъаласы. Алгъа салынгъан жаваплы борчлагъа айсенилик булан янашмагъа тюшмей.

Бек анасы йыламас деген буварывгъа да тергевлю янашыв гьажатлы. Кёп йыллыкъ сынав ташдырагъаны йимик, ялын яшны да, уллуну да къызгъанмай, ону булангъы оюнну ахыры заралгъа токътай. Оьмюр боюнда топлангъан мал-матагьы да къолдан чыкъмагъа болагъаны гьакъда унутмагъа ярамай.

Белгили багъаны йимик, бу йылны биринчи яртысында Дагъыстанны агъачлыкъ фондунда эки от тюшювден 30 гектаргъа ювукъ майданда тереклер ва оьсюмлюклер зараллангъан.

Генгешни ортакъчыларыны арасында гюнлюк низамгъа салынгъан «Экология» деген милли борчну оьлчевюнде юрюлеген ишлени натижалары, ижара гьакъланы тёлевню барышы гёзден гечирилди ва гележекге байлавлу агьамиятлы борчлар белгиленди.

Генгешни жамын чыгъара туруп, республикабызны баш орманчысы бизин республикабызгъа ял алмагъа ва савлугъун беклешдирмеге къонакълай гелеген туристлени аманлыгъын сакъламакъ учун агъачлыкъларда къошум чараланы гёрмеге тюшегени гьакъда айрыча эсгерди ва тапшурувлар берди.