«Россельхознадзорну» Дагъыстанда иш гёреген управлениесини сиптечилиги булан бугюнлерде Дагъыстанны Гьукуматыны зараллы аврувланы алдын алывгъа байлавлу иш гёреген комиссиясыны жыйыны оьтгерилген. Шо гьакъда эсгерилген къуллукъну башчысыны заместители Гьажимурат Ашаханов республикабызны маълумат къуралларыны къуллукъчуларына оьз пикруларын малим этген.

 

– Дагъыстангъа Россияны лап да кёп гьайван-мал сакъланагъан ­отаву деп негьакъ айтылмагъан, – деп узатгъан ол оьзюню баянын. – Бизин респуб­ликабызда сакъланагъан къой ва эчки малланы умуми санаву 5 миллиондан айлангъан. Шону учун оьзге регионлардан Дагъы­стангъа  аврувлар яйыл­масын учун ветеринар аманлыкъны алгъасавлу кюйде  чаралары оьтгерилмесе, тас этивлени алдын алма четим болажакъ.

Эсгерилген комиссияны ортакъчылары арагъа салынгъан масъалагъа байлавлу болуп оьз пик­руларын аян этив булан дазуланмай, агьамиятлы тармакъны оьсювюне зиян болмасын учун пайдалы таклифлер берген.

Жыйынны ахырында респуб­ликабызда гьайванчылыкъ булан машгъул болагъан хозяйстволаны башчыларына ерлердеги гьалны ахтарып зараллы аврувланы алдын алмакъ учун ветеринар аманлыкъны чараларын оьтгермеге тюшегени гьакъда хас тапшурувлар берилген.

Арадан оьтген вакътини ичинде топлангъан сынав ташдыра­гъан кюйде, гьайванчылыкъ малланы къоллайгъанланы савлугъу ва аманлыгъы сурсат малланы тазалыгъы булан тувра байлавлу. Шону учун республикабызны бары да муниципал къурулувларында англатыв ишлени чараларын гёрмек къатты кюйде буварыв этилинген.

 

Къарамагьаммат Къараев.