Арадан нечакъы йыллар гетсе де, оьзюм охугъан юрт мактапдагъы яш йылларым, бир класда охугъан ёлдашларым, охутгъан муаллимлерим унутулмай. Оьрде эсгерген кюйде, оланы авадан пайы дюньяда ёкъ буса да, ярыкъ келпетлери, юрюшлери, кюлкюлери гёз алдымдан таймай.

Мен мактапгъа биринчилей охума баргъан гюнден берли 67 йыл тамамланды. Гёресиз, шондан берли нечакъы агъым сувлар денгизге тёгюлген. Бизин охутгъан муаллимлерден экевю сав.
О заманларда Адил ­Янгыюрт мактапда муаллимлени авадан пайы орус къатынлар ва эренлер эди. Биз де бир орус сёз де билмей, муаллимлерибиз не айтагъанны англамай эдик.
Бешинчи класгъа ерли дарслар ана тилде юрюлдю. О дарсланы юрютеген муаллимлени де артыкъ билимлери ёкъ эди. Бизин яртынчы класда Гьажакъа Гьажиев охутду. Артда ону Уллу Ватан давну ортакъчысы Абдуламит Байрамалиев алышдырды. О бизин дёртюнчю класгъа етишдирип къойду. Дёртюнчю класны ёлбашчысы болуп Гьанив Сапаева ишледи. Бек илиякълы, охувчулагъа гьар дарсны тындырыкълы ­англата эди. Буссагьатда да, арадан кёп йыллар гетсе де, ону ярыкъ келпети, айтагъан сёзлери гёзюмню алдында.

Бешинчи класда 26 охувчу бар эдик. Класыбызны башчысы Къайырхан Аварханович Каханов эди. Сонггъа таба ишчи дарсланы муаллими Агьмат Хизириевич Алиев ёлбашчылыкъ этди.
Алтынчы класда 14 улан ва 12 къыз бар эдик, клас ёлбашчыбыз да Гьасан Сайитсалимович Адилгереев болду. Ону гьакъында кёп исси сёзлер айтмагъа боламан. Ол аякъмашин де булан гьар охувчуну ата-анасына етише эди. Дарслагъа гелмей къалгъан охувчуланы артындан барып, аякъмашинини артында да олтуртуп, мактапгъа алып гелеген гезик­лер де болгъан. Гь. Адилгереев жагьил улан болса да, класы учун юреги де авруп, оьзю юрютеген математика дарсны ажайып уста кюйде охувчулагъа тындырыкълы англата эди. Узакъ къалмай ол Бабаюртгъа гёчюп, школа-интернатда загьмат тёкмеге башлады. 7-нчи класдан башлап, охувну битдиргенче, Магьмут Эдилмурзаевич Закарь­яев клас башчы болуп турду.

Шо девюрде мактапны охувчулары гьар тюрлю кружоклагъа къуршалып охуй эдилер. Рашит Юсуповични къасты булан онда тарих музей къурулду. Гьар юртдан, уллу чагъындагъыланы эсге алывларын язып, кёп документлер жый­гъан эдик. Бизден сонг Рашит Юсупович де гетгенде, артдагъыланы гьайсызлыгъындан тарих музей таланып ябылды. Къырдан гелген муаллимлени бирлери Яков Пивень, Г. Ханукаев мактапны ёлбашчылары болуп ишледилер. Мен оьр класда охуйгъанда мактапны ёлбашчысы болуп А.Б. Магьмутов ишледи. Мен мактапны тамамлайгъанда, А.А.Давутов ёлбашчылыкъ эте эди. Шо йылгъы 19 охувчудан бугюнлерде 6-ву сав. Къалгъанлары гьар тюрлю йылларда дюнь­ядан гёчдюлер.

Алдагъы муаллимлерибизни охувчуларыны наслулары гьали юртда мактапда ишлейлер, яш наслугъа билим берелер. Яшав токъталмай, кериван гетсе де, наслулар гетмей.
Муаллимлени арасындан мен инг де сюеген ана тилден дарс береген Керим Къайпитович Жумагъулов эди. Ону гьакъында кёп исси сёзлер айтмагъа боламан. Сонггъа таба да ону булангъы аралыкъны уьзмедим. Къалам тутуп язмагъа да ол ёл гёрсетди. Артда мени наслуларыма да ана тилден дарс бере эди. Экинчиси РСФСР-ни ва ДАССР-ни ат къазангъан муаллими Мадина Атаевна Иброва эди. Ону дарсларында жибин учагъан тавушу эшитиле, шолай низам салып бажаргъан эди. Оьзю яшавдан эрте гетсе де, бизин эсибизден ону аты бир заманда да таймажакъ.
Ёлугъувларда оланы атларын эсгеребиз. Дюнь­ядан гёчгенлерине Аллагь рагьмат этсин деп айтабыз.

Къасумхан-гьажи ГЬАЖИЕВ.

Адил Янгыюрт,

Бабаюрт район