Май айны 29-нда ДР-ни Башчысы Сергей Меликов Дагъыстанны Халкъ Жыйынына гьар йыллыкъ Чакъырывун малим этди. Респуб­ликабызны яшавлукъ-экономика оьсювюнде кюрчю масъалаланы аян этеген Чакъырыв бизин республикабызны халкъларыны, депутатланы, тармакъ министерликлени башчыларыны ва оьзге тайпаланы янындан генг кюйде якълав тапды.

Шолай агьамиятлы масъалалар гётерилген, борчлар белгиленген Чакъырывгъа байлавлу болуп ДР-ни Халкъ Жыйыныны депутаты, аграр ва экология комитетни башчысы Асият Алиева да оьз пикруларын аян этди.

– Дагъыстанны Башчысыны ДР-ни Халкъ Жыйынына тапшурагъан гьар йыллыкъ Чакъырыв кагъы­зы бизин алдыбызда республиканы оьсювюне байлавлу яшавгъа чыгъармагъа тюшеген аслу борч болуп токътай, – деди Асият Наримановна оьзюню пикруларын аянлашдыра туруп. – Шонда  регионну башчысы арадан оьтген бир йлны ичинде оьтгерилген ишлени, етишилген уьстюнлюклени натижаларын ачыкъ этип гёрсете ва шону булан бирче гележекге лап да агьамиятлы борчланы белгилей. Гезикли Чакъырывда халкъны-къоллавчуланы талапларын гьисапгъа алып, яшавлукъ масъалаланы ёрукълашдырыв, хас асгер гьаракатны ортакъчыларына кёмеклешив, промышленный ва туризм тармакъланы оьс­дюрювню масъалалары айрыча хат булан эсгериле.

Озокъда, Дагъыстан – аграр республика. Россияда  халкъны ва пачалыкъны сурсат аманлыгъы учун юрюлеген гьаракатны ал сыдраларында демеге ихтиярыбыз бар. Шону гьайванчылыкъ ва оьсюмлюкчюлюк тармакъларда йыл са­йын артып тербейген натижалары да ачыкъ этип гёрсете. Овощлар, чалтик, юзюм, емишлер оьсдюрювде, гьайванчылыкъны мердешли тармакъларында болдурулагъан юрт хозяйство продукцияны оьлчевлери йылдан-йылгъа къолайлаша бара.

Белгили болгъаны йимик,  бизин респуб­ликабызны халкъларыны авадан пайы, дагъы да ачыкъ этип айтгъанда, ишге гючю чатагъан тайпаланы 60 процентге ювугъу яшай ва юрт хозяйствону асувлулугъун артдырывда аслам къошумун болдура. Айтмагъа сюегеним, юрт  ерлерде яшайгъан­ланы талапларын Дагъыстанны Башчысы тергевсюз къоймайгъаны англашыла. Шону булан янаша айлана якъдагъы экология масъалаланы ёрукълашдырывда тазалыкъ ва аманлыкъ учун алгъа агьамиятлы борчлар салынгъан.

Гележекде де юрт хозяйство къуллукъчулар учун ­онгайлы шартланы яратыв ва айлана якъны аманлыгъын болдурувда бар имканлыкълар асувлу кюйде пайдаландырылажагъына шеклик ёкъ. Республикабызны юрт хозяйство тармагъында тармакъ министерликде 12 хас инвестиция проектлер, милли борчлар яшавгъа чыгъарылагъаны, регионну уьч боюнда къалды-къулдуланы ишлетеген уьч уллу заводланы къурулушу давам этилинегени де шону ачыкъдан ташдыра.

 

Гьазирлеген Къ. КЪАРАЕВ.