Бюртюкден баш бола, башдан аш бола.Бугюнлерде бизин рес­публикабызны ашлыкъ оьсдюрювчюлери шону гьисапгъа алып, бар да гьаракатын янгы тюшюмню тас этивлерсиз къайтарывгъа бакъдыргъан. Неге десегиз, айлана якъда чакъны гьалы бир йимик турмай, алышына. Бир де гючлю явунлар бола, еллер де четимликлени тувдура, бир де буса  яллавлу гюнлер ашлыкъланы къаврата. Шолайлыкъда, авурлукъ алгъан будай башлар тюпге ятып, оруп алмагъа къыйын бола…

Заман алгъасата. Республикабызда гюзлюк ашлыкъланы къайтарывну болжаллары белгиленген. Бу гезик де, алдан берли адатлангъаны йимик, ашлыкъланы тюшюмюн къайтарыв компанияны биринчилерден болуп Хасавюрт районну юрт хозяйство къуллукъчулары башлады.

Эсгерилген райондагъы «Гранит» деген юрт хозяйство производство кооперативни коллективи ашлыкълар оьсдюрювде топлагъан бай сынавундан бугюнлерде асувлу кюйде пайдалана демеге ярай. Яхсайны авлакъларында арпа орув къызгъын кюйде давам этилине.

Алдынлы хозяйствода орув ишлени барышы булан ишчи сапарында ДР-ни юрт хозяйство ва сурсат министрини биринчи заместители Шарип Шарипов, районну юрт хозяйство управлениесини начальниги Идрис Загалов, республикабызны бавчуларыны регион союзуну председатели Сайдула Орусханов ёлдашлар ювукъдан таныш болгъан.

– Бу йыл бизин ашлыкъ оьс­дюрювчюлерибиз 2500 гектар майдандагъы гюзлюклени тюшюмюн белгиленген болжалларында тас этивлерсиз къайтармагъа токъташгъан, – деген, ишчи сапарны ортакъчыларына англатыв бере туруп, кооперативни  башчысы Адил Гереев. – Буссагьатгъы вакътиде авлакъда орувда 4 ашлыкъ къайтарагъан комбайын къуршалгъан. Къайтарылгъан бюртюкню къурутуп ва тазалап беженлеге къотармакъ учун алданокъ инныр гьазирленип онгарылгъан. Айтмагъа сюегеним, бугюнлерде жаваплы компанияны ортакъчылары ва механизаторлар учун да онгай­лы шартлар яратылынгъан. Техника запас частлар ва ягъарлыкъмайлав материаллар булан таъмин этилине. Орув  эртенлер тез башлана ва ахшамлар геч болгъунча узатыла…

Белгили болгъаны йимик, савлай республикабызда гюзлюк ашлыкълар бу йыл 90 минг гектаргъа ювукъ майданда къайтарыла. Къайтарывну алдында тюшюмлени сан янын тергеген Россельхозцентрны касбучуларыны баянына гёре, ашлыкъланы авадан пайындан мол тюшюм алмагъа умут этилине. Жаваплы компанияда 430 комбайын ва 400 юк ташыйгъан машин къуршалгъан.

Гюзлюклени къайтарывда  Хасавюрт, Къарабудагъгент, Ногъай, Къызлар районланы ашлыкъ оьсдюрювчюлери алгъа салынгъан борчланы яшавгъа чыгъармакъ учун юрюлеген гьаракатны ал сыдраларында оьзгелеге де уьлгю гёрсете.

 

Къ. КЪАРАЕВ.

СУРАТДА:  «Гранитни» авлагъында.