Яшнагъанны сюебиз биз тав-ташлар,

Биз сюебиз болмагъа дос-къардашлар.

«Яхшылар тувса, элде ер яшнар,

Яманлар тувса, – дейлер – дав башлар».

 

Кёплер чапды кёпюр этип кёклени,

Къара булут ябып, болуп ел-явун.

Бизге батып болагъан гюч ёкъ энни,

Армиябыз  бошатмай гьеч белбавун.

 

Дазуларда жайрандан да биз сакъбыз.

Ятлар бизин даим уяв  тапгъанлар.

Ишге тюшсек, ишде де биз къувнакъбыз,

Давгъа тюшсек, дюрбюз  арсланкъапланлар.

 

Яшав сюе бизде яшлар ва къартлар,

Парахатлыкъ учун загьмат  тёгебиз.

Тек хапарсыз хапма сюйсе намартлар,

Армиябыз  – гюлле батмас гюбебиз.

 

Супиянат МАМАЕВА

 

Элибизни  якъларбыз

 

Гёз алда байракъ,

Игитлер къакъгъан.

Юрекде  сююв –

Ватангъа бакъгъан.

 

Белсенип такъгъан

Савут белимде.

Якъларман явдан

Азиз элимни.

 

Кирпигим къакъман,

Къатарман ташдай.

Ватанын якълар

Къатарбаш яшлар.