«Врачны касбусун танглагъан гиши оьз ишин сююп, яхшы бажарып юрютмек де – уллу къоччакълыкъ. Бу касбу гьар адамдан яшавда герти кюйде токъташмакъны, юрегинде ва хыялларында таза, гьалал болмакъны талап эте».
Врач ва язывчу А.П.Чехов.
Адамлар бырынгъы девюрлерден башлап да оьзлени яшаву, аманлыгъы учун ябуша, савлугъу учун талаша гелген. Врачны касбусун танглагъанлар буса, инсанны чинк де багьалы саналагъан савлугъуну гьайын этип чалышалар. О – ер юзюндеги инсанланы аврувлардан-сыркъавлардан къоруйгъан, оьз гючлерине инамлыгъын артдырагъан, авур болса да, абурлу, инсаплы ва оьтесиз жаваплы касбу. Врачгъа терен билимли, англавлу ва сынавлу болмакъдан къайры, рагьмулу да, тергевлю де болма тюше. Хантав болуп йиберилген бир гиччирек хатасы да уллу къайгъы гелтирме, балагьгъа тарытма болагъанны огъар даим эсинде сакълап чалышма тюше.
Бугюнлерде Гьажиева Валида Расуловна Москва шагьарда Россияны темир ёлларыны табилигиндеги Н.А.Семашкону атындагъы больницаны «РЖД-Медицина» деген поликлиникасыны заведующийи болуп иш юрюте. Ол мунда уьстюнлю кюйде, уьлгю гёрсетип чалышагъаны он йыллар гетип де тура. Валида Гьажиева Россияны терапевтлерини илму медицина жамиятыны члени гьисапда да хыйлы иш юрюте. Ватандашланы савлугъун сакълав ва беклешдирив тармакъда тезден сыналгъан ва бугюнгю алдынлы технологиялагъа аркъа таяп чалышагъан коллективни башын тутгъан. Ол касбу усталыгъын ва бажарывлугъун къоллап, оьзюнден кёмек ахтарып гелгенлеге рагьмулу къолун узатып, ишин гьалал ва намусу булан кютегени учун Россияны бусурманларыны дин управлениесини атындан Баракалла кагъызлар алгъан, Москва шагьар депутатларыны Грамотасы булан савгъатлангъан.
2024-нчю йылны май айында Гьажиева Валида Расуловнагъа эсгерилген тармакъдагъы ишни оьр даражада къуруп яшавгъа чыгъарагъаны саялы «Россияны темир ёллары» деген ачыкъ акционер жамиятыны правлениесини председатели-генеральный директору О.В.Белозёровну Баракалла кагъызы да тапшурулгъан.
Алдагъы гюнлерде ишинден отпуска алып доскъардашыны янына агьлюсю де булан бирге гелип, гёрюп ял алма токъташгъан Гьажиева Валида Расуловна булан бизге «Ёлдаш» газетни редакциясында ёлугъуп, къысгъаракъ лакъыр этме имканлыкъ болду.
– Валида Расуловна, Дагъыстан Республикада алгъан билимлеригиз булан, къысматны язывуна бойсынып, Москвагъа да барып ондагъы айтылгъан, савлукъ сакълав ожакъланы бирисинде ишлемеге нечик тавакеллик этдигиз?
– Билемисиз, бизин къумукъланы къоркъгъанны къоя буса, къоянны къояр эди деген еринде айтылгъан оьтесиз тизив айтыву бар. Ондан къайры да, респуб-ликабызны оьр охув ожакъларыны бирисинде алгъан билимлерим мекенли экенине, ординатурада топлагъан сынавларыма герти аркъа таяма болагъаныма мен бир де шеклик этмей эдим, – деп сабур-саламат кюйде жавапланды Валида. – Тюзю, башлапгъы вакътилерде бир-бир авруйгъанланы магъа бакъгъан сувукъ-салкъын къаравларын да гьис этмей тюгюл эдим. Атлары айтылгъан, терен сынав топлагъан, яхшы англаву да бар алимлер токъташдырагъаны йимик; бары зат сёзден башлана. Арив, исси сёйлеп, гьаллашып-гьакълашып дегенлей иш юрюте туруп, мени гьар къайсы якъдан да яхшы англавум-билимим барны гёргенде, олар магъа оьз адамына йимик инанып янашагъан болгъанда, юрегиме бир тамаша енгиллик де гелди. Халкъ арада арив сёзде аврув ёкъ, арив сёз йыланны да кебин чечер деп айтылагъаны да негьакъ тюгюлдюр!
– Гьалиден 11 йыл алъякъда къабул этилип бугюнюгюзге ерли сиз ишлеп де турагъан савлукъ сакълав идараны эсгерип, иш ёлдашларыгъызны, олар булан бирге кютеген къуллукъланы, алдыгъызгъа салынгъан борчланы гьакъында хабарла-гъаныгъызны сюер эдик.
– Инг алдын Магьачкъалада Ветеранланы госпиталыны медицина центрында ишлейгенде терен англаву, билимлери ва сынаву булангъы врач-кардиолог Гьажиева Лайла Хидириевнаны дарслары мени бютюн яшавума уьлгю болуп токътагъанын уллу гьюрмет булан эсгерер эдим. Бугюнлерде де ол Редукторный посёлокда ерлешген больницада баш врачны заместители болуп чалыша, – деп хабарлай Валида. – Биз аслу гьалда Москва шагьардагъы темир ёлланы къуллукъчуларыны ва агьлюлерини савлугъуну гьайын этебиз. Поликлиниканы заведующийи гьисапда мен къурумчулукъ ишлер булан машгъул болагъандан къайры да, терапевт-кардиолог гьисапда юрек аврувлагъа тарыгъанланы багъаман.
Бизин центрда Россиядагъы темир ёлчуларыны баш кардиологу, юрекни тамурларын багъагъан хирургия кафедрасына ёлбашчылыкъ этеген профессор, пагьмулу ва бажарывлу врач Шугушев Заурбек Хасанович ким-ким де ажайып болар йимик бек четим операцияланы уьстюнлю кюйде оьтгере.
Темир ёлларда загьмат тёгеген касбучулар ажайып халкъ. Олар оьз ишине къаны-жаны булан берилип къалгъан адамлар. Болмайгъан ерине етишмей туруп, савлугъуну гьайын этме къарамайлар. Поликлиниканы центрында 60-гъа ювукъ бажарывлу касбучулар ишлей. Мунда инг яхшы ва алдынлы медицина ясандырывлар ва алатлар булан таъмин этилген операциялар этеген эки зал бар. Оланы бири – центр микрохирургии глаз, экинчисинде буса урология операциялар этиле.
Гёз аврувланы багъагъан бёлюкде 1600 операцияны ерине йылда 5 мингден къолай адамгъа гёзлерини нюрюн, ярыгъын къайтарма бажарыла. Шолай, оьз ишин теренден билип, англап юрютеген касбучулар бизде нечакъы да бар. Ватандаш-ларыбызны гёнгюн ачып, савлугъун сакълап, беклешдирме къаст да, къошум да этме имканлыгъым баргъа, билимим, сынавум етишегенге сююнемен, энниден сонг да олагъа гючюм чатагъан чакъы кёмегимни болдурма хыял этемен.
Агьлю яшавуну гьакъында сорама сююп турагъанымны алданокъ гьис этген Валида Расуловна чечек ачып, къанатланып гетгендей исси кюйде иржайды.
– Уллу къызыбыз Милана оьзюне 10 йыл тюгюл болмаса да, мамам йимик доктор болажакъман деп тутгъан, – дей ол. – Гиччиси Илмуханым да школаны охуп битдиргенде гьалиденокъ законланы, ихтиярланы якълайгъан касбучу, юрист болма муштарлы экенин яшырмай айта. Озокъда, оьсе туруп, яшланы ойлары, хыяллары алышынып къалма да болагъанын англайбыз. Чинкдеси олар охувдан, билим алывдан баш къачырмай, тынглавлу да, англавлу да болуп оьселер.
Тувгъан, оьсген гиччи элинден-ватанындан арекде болса да, ата-анасы берген тарбиягъа амин къалып, алгъан билимлерин, касбу бажарывлугъун уста кюйде къоллап, ишин яхшы даражада юрютюп турагъан асил уьягьлю, ана ва пагьмулу врач Гьажиева Валида Расуловнагъа алагъан гьар абатынг яхшылыкъгъа алынсын, юрегинге тюшген асил муратларынга етишме насип болсун деп ёрамагъа сюемен.
Казим КАЗИМОВ.
БИЗИН МАЪЛУМАТ:
Гьажиева Валида Расуловна 1990-нчы йылны март айында Хасавюрт шагьарда тувгъан. Атасы Расул узакъ йыллар администрацияны къурулуш ишлер юрютеген бёлюгюнде, анасы Загьив яшлар бавунда физкультура якъдан тарбиялавчу болуп ишлеп тургъанлар. Валида – агьлюдеги яшланы уьчюнчюсю. Ол Хасавюртдагъы 10 номерли школаны яхшы къыйматлагъа охуп битдире. Атасыны: «Мени къызым оьсюп-оьсюп, охуп-охуп оьр билимлер алажакъ, инг де асил ва тарыкълы аврувланы багъывчусу, докторну касбусуна ес болажакъ», – деген ушанывларына, ёравларына терен агьамият берип тынглай туруп, гележекде танглажакъ касбусун савлукъ сакълав тармакъ булан мекенли кюйде байламагъа токъташа.
2005-нчи йыл ол Дагъыстан пачалыкъ медицина академиягъа охума тюше ва 2011-нчи йылда уьстюнлю кюйде битдире. 2011-2013-нчю йылларда Магьачкъала шагьардагъы Ветеранланы госпиталыны медицина центрында врач-ординатор болуп ишлей туруп, «Лечебное дело» деген касбусуна гёре ординатураны да тамамлай. Уьйленген. Агьлюсю ва эки авлети бар.
