Апельсинни 100-ден къолай тюрлю-тюрлю журалары белгили. Бу емишни къабугъу да эпсиз пайдалы. Ону спиртде этилген суву (настойкасы) къыз—дырмабеззекни эбинден гелме кёмек эте. Сувда къайнагъан къабукълары буса, адамны ичинден тёгюлеген къанны токътатма бола.
Апельсинни къысып чыгъаргъан суву витаминлерден бек бай. Шону согу адамны ашгъа дамагьын гелтирте, ичеклени ишлевюн ёрукълашдыра. Сав болуп битмейген ярагъа, чыгъывгъа апельсинни сувун салып байласа, тез сав эте.
Апельсин ичеклери авруйгъанлагъа айрыча пайдалы. Тек бу ерде ичеклерде, ашкъазанда ярасы булангъылагъа ону къоллама ярамайгъанны айрыча эсгерме тюше.
Апельсинни къабукъларын ташлап йибермей, къазангъа салып, уьстюне къайнар сув тёгюгюз. Шо сувугъанда сюзюп алсагъыз, бетигизге сюртме атир ийисли сув болажакъ. Шолай сув бетни гёнюне арив ренк бере, ону тазалай.
П. ГЬАЙБУЛЛАЕВА.
