Россияны Президенти Владимир Путинни къарарына гёре, бу йыл октябр айны 1-нден тутуп декабрни 31-не ерли Савутлу  Гючлерини сыдрасына асгер борчун кютмек учун чагъы етишген яшерюмлер чакъырыла. Бу йыл Федерал законуну янында алмашынывлар да бар. Энни шогъар байлавлу ерлерде англатыв ишлер юрюле. Бираз алдын Хумторкъали районну Къоркъмаскъала юртунда болгъан ёлугъувда эсгерилген районну башчысыны заместители Марат Жанбалов ва ДР-ни Къызылюрт шагьаргъа, Къызылюрт ва Хумторкъали районлагъа къарайгъан военный комиссариатыны къуллукъчусу Исрапил Магьамматов ортакъчылыкъ этдилер.

 

Шолай ёлугъув ол гюнлерде Къызылюрт районну администрациясында да юрюлдю. Бу ёлугъувларда Хумторкъали районну ва Къызылюрт шагьарны башчысыны заместителлери Марат Жанбалов ва Амирхан Амирханов, олай да Къызылюрт районну башчысы Рустам Татарханов ерли админист-рацияланы башчыларын, къуллукъчуларын ва асгерге чагъы етишген яшёрюмлени гьисапгъа алывну юрютегенлени (русча начальники ВУС-(военно-учетный стол) бу масъалагъа тындырыкълы ва мекенли янашмагъа чакъырды.

ДР-ни Къызылюрт шагьаргъа, Къызылюрт ва Хумторкъали районлагъа къарайгъан военный комиссары Шейхсайит Магьамматов да оьзюню сёйлевюнде бу гюздеги чакъырывну низамы къатты салынгъанын эсгерди. Ол ерлердеги къурумланы ва идараланы гьакаимлерине чи нечик де, гьатта оьзге асгерге чагъы етишген яшёрюмлеге де тёлев гьисапда салынагъан къодуну оьлчевю некъадар бир-нече керен артгъанын айта туруп, вакътисинде ва заманында повестка булан гелип, баш чарасын гёрме тюшегенин билдирди.

Ол энниден сонг повесткалар электрон къайдада тапшурулажагъын да аян этди.

Дагъыда ол Дагъыстанда «Каспий» деген ат булан янгыз дагъыс-танлылар булан айрыча батальон къурулагъанын ва шонда гёнгюллю кюйде язылмагъа сюегенлер бар буса, гьисапгъа алагъанын айтды.

 

Алибек САЛАВАТОВ.