Россияны Ахтарыв комитетини Дагъыстан ахтарыв управлениеси алдагъы Сергокъала районну башчысы Магьаммат Омаровгъа къаршы уголовный иш ачгъан. Ол судну къарары булан эки айгъа эркинликден магьрюм этилген.
Ахтарывчулар токъташдырагъан кюйде, М. Омаров район админис- трацияны оьзге къуллукъчулары булан сёйлешип, 2016-нчы йылдан тутуп, 2022-нчи йыл болгъанча ерли муниципал газетге оьзюню бир нече юртлусун ишге салгъан болгъан. Тек олар бир гюн де ишге чыкъмагъан, борчларын кютмеген, амма низамлы кюйде гьар айда алапа алып, акъчаны районну башчысына берип тургъан. Шону булан пачалыкъгъа 697 минг манатны оьлчевюнде зарал гелтирген. Ахтарывчулар ёрайгъангъа гёре, М. Омаров шо акъчаны оьзюню къаравулларына бере болгъан.
Белгили кюйде, июн айны 23-нде Магьачкъалада ва Дербентде этилинген террорчу чапгъынны ортакъчыларыны арасында М. Омаровну уланы да болгъан. Шондан сонг муниципал къуллукъчу ишинден ва «Единая Россия» деген партияны сыдраларындан тайдырылгъан.
Алав Алиев
