Коронавирус яйылгъан вакъти биревге де тынч тюгюл. Шогъар къаршы бакъдырылгъан гьаракатны авур янын докторлар кюте. Булай къыставуллу вакъти гече-гюн яллыкъ билмей ишлейген медицина къуллукъчуланы аямакъны ва гёнгюн алып билмекни кёп агьамияты бар.

 

Коронавирус къабунгъандан берли, адамланы ятдырып сав этмек учун районда Тёбен Къазанышдагъы, Эрпелидеги, Чиркейдеги больницалар иш этип шогъар гёре онгарылды.

Алдагъы гюн Буйнакск районну баш гьакими Камил Изиев, уьч де больницагъа барып, шоларда ишлени гьалы нечик экенни тергеп чыкъды. Шоларда аврувланы багъагъан гьаракатчы докторлагъа ашамлыкъ пайлар тапшурду. Лакъырны барышында ол Къазанышдагъы больницаны баш врачы А.Абдуллатиповгъа дарманлар булан таъминлик нечик экенни, аврувлагъа ятып сав болмагъа не йимик шартлар яратылгъанны, етишмейген затлар барны-ёкъну сорап билди.

– Бу гьалиги авур шартларда оьзлеге гюч этип ишлейген докторлагъа барыбызны да яныбыздан ти­йишли исси янашыв да, кёмек де болмаса ярамай. Сизге тарыкъ-герек дагъы да затлар бар буса, шоланы да гьайын этмеге нечакъы да къасткъылажакъбыз, – деди К.Изиев.

Оьз гезигинде акъхалатлы «эмчилер» оьзлени аяй­гъанланы, къолдан гелеген кёмекни этмеге сесленегенлени, арив сёйлеп гёнгюн хош этегенлени барысына да разилик билдирдилер.