Россияны ДОСААФ-ны Дагъыстандагъы бёлюгюню ёлбашчысы Шамил Алиев чакъ-чакъда журналистлер булан ёлугъуп, оьзлени къурумуну иши гьакъда лакъыр юрютегени, СМИ-ни къуллукъчуларыны соравларына жавап берегени адатлангъан мердешге айлангъан демеге ярай. Бу гезикде РИА «Дагестан» деген маълумат агентлигинде ону булан гезикли прес-конференция оьтгерилди.

Ол оьзюню гиришив сёзюнде ДОСААФ-ны тарихин, шону къурулгъан заманын (23 январ 1927 йыл) гёзден гечирди ва 100 йылланы узагъында ону чалышыву замангъа гёре тюрленип, шогъар сесленип юрюгенни айтды.

Дагъыстанны ДОСААФ-ны бугюн гьар тюрлю агъымлагъа гёре иш юрюте. Мисал учун, биз военный-патриот чаралар оьтгеребиз, ватандашланы асгер къуллукъгъа, гьар тюрлю транспортлагъа гьайдавчуланы гьазирлейбиз, сонг да военный къуллукълагъа касбучуланы онгарабыз.

Гертиси, гьали буссагьат Украинада юрюлюп турагъан хас асгер чаралар бизин ишибизни агьамиятлыгъын гётерди, оьсюп гелеген наслуну патриот ругьда тарбияламакъны, асгер къуллукъгъа гьазирлемекни кёп уллу маънасы да, пайдасы да барны дагъындан да бек исбатлады. Бугюн бизин ДОСААФ-гъа 42 шагьар райсовет, 7 билим берив ожакъ, 3 спорт-техника клуб гире. Бизин къурумда 780 оьрюм яшлар охуй,¬-деп белгиледи Шамил Алиев.

Бу ёлугъувну ахыры айрокъда жанлы болуп гетди. Неге тюгюл, «Дагестанская правда» газетде чалышагъан касбу ёлдашыбыз Арсен Моллаевни яш наслуну военный-патриот тарбиялавда этген къошуму учун Россияны ДОСААФ комитетини «Биринчи уьч керен Совет Союзну Игити А. И. Покрышкин» деген сыйлы медаль булан савгъатлады.

Бизин мухбирибиз.