Агъач байлыкъларыбызны айланасында

Дагъыстанны тав, тавтюп ва тюзлюк бойларындагъы топуракъ байлыкъларыны йимик, шо кюйде агъачлыкъларыны да асувлулугъун, хайырын гьисапгъа алып, оланы къорувну масъаласына айрыча янашыв болмагъа тюше.

Айтмагъа сюегенибиз, топурагъындан эсе таву-ташы кёп Дагъыстанда агъач байлыкъларыбызны оьлчевлерин кемимеге къоймайлы, умуми майданларын толумлашдырыв да сыйлы борч болуп токътай. Неге десегиз, агъачлыкълар  – дюньяны оьпкелери. Бизге азыкъ бере, алатопанлардан, сувукъдан къоруй, булакъланы, оьзенлени ва оьзге сув гьавузланы къурумагъа къоймай…

 

Шону учун юрюлеген гьаракатда ДР-ни агъач байлыкъларын къорувгъа къарайгъан агентлигини коллективи оьзлени алдына салынгъан жавап­лы борчлагъа янашыву нечикдир деген сорав тувулуна. Уьстде эсгерилген агьамиятлы масъалагъа байлавлу болуп бугюнлерде агъачлыкъ хозяйство агентлигини башчысы Абдулвагьап Абдулгьамитов оьзюню прес-конференциясында республикабызны маълумат къуралларыны къуллукъчуларына къысгъаракъ баянлыкъ берди.

– Дагъыстанны агъачлыкъ фондунда 530 минг гектаргъа ювукъ майданлар гьисапгъа алынгъан, – деп башлады оьзюню баянын Абдулвагьап Магьамматович. – Фондда гьисапгъа алынгъан умуми майданыны 300 минг гектаргъа ювугъун агъач­лыкълар бийлеген. Бизин агъачлыкъ хозяйство агентлигини коллективи ерлердеги муниципал къурулувлары булан байлавлукъда агъач аралардагъы бош ерлени ахтара, орман тереклер орнатывгъа айрыча тергев бере. Шону учун Ногъай, Къаягент ва Сулейман-Стальск районларда тереклер оьсдюрюлеген питомниклер къурулгъан ва пайдаландырыла. Агъач байлыкъларыбызны тас этивлерден къорумакъ учун, от тюшювлени алдын алмакъ муратда адамланы,  пачалыкъ, жамият къурумланы арасында англатыв ишлени юрютювге айрыча тергев бакъдырыла.

Белгили болгъаны йимик, агъач байлыкъларыбызны тас этивлерден къоруп сакъламакъ мурат булан зараллангъан тереклерден тазаламакъ учун гьар йыл санитар чаралар оьтгериле. Уьс­тевюне, аманлыгъына байлавлу болуп зараллы аврувлардан ва зиянлы жанлардан къоруп сакъламакъ учун да дарман урув ишлер оьз болжалларында юрюле.

Дагъыстанны агъачлыкъ фондуна муниципал еслигиндеги агъачлыкълар гийирилмей. Тек шогъар да къарамайлы,  эсгерилген агентлигини кёмеги булан шагьарланы ва юртланы, сув гьавузланы айланасында, ёл ягъаларда адамланы, жамият ва пачалыкъ къурумланы къуршап тереклер орнатыв, эсделик бавларын салыв мердешге айлангъан.

Агъач байлыкъланы къоруп сакъламакъ учун балжибин сакълайгъанлар, ем топлайгъанлар ва шолай да юрт хозяйство, дарман оьсюмлюклер оьс­дюрюв булан машгъул болмагъа муштарлылар булан башгъа-башгъа болжаллагъа ижара дыгъарлар байлана.

2023-нчю йылда регионну агъачлыкъ хозяйство фондуну материал-техника базасы 36 миллион манатгъа толумлашдырылгъан. Коллективде ишлейгенлени умуми санаву 600-ге етише. Тек не этерсен, оланы орта айлыкъ алапасыны къадары 17-18 минг манатлардан оьтмейгени  гьакъда да  разисизлик булан айрыча эсгерилди.

 

Къ. Къараев.

СУРАТДА: Абдулвагьап Абдулгьамитов.

Авторизация
*
*
Регистрация
*
*
*
Согласны с условиями сайта?
Генерация пароля