Июн айны 13-де, ахшам вакъти, Магьачкъалада кёклер тешилгенде йимик гючлю янгурлар явду. Аз заманны ичинде орамлар оьзенлеге айланды. Уьстевюне, къатты ел де гётерилди. Гьатта уллу къурулуш кранланы бирисин авдарма да авдарды.
Чакъ алышанажакъны ва сакъ болмакъны гьакъында МЧС ватандашлагъа алданокъ билдирген эди. Тек шогъар да къарамай, кёклени къап-къара булутлар елеп барагъанын, ел гючленегенин гёре ва гьис эте де туруп, денгизде киринегенлер болгъан. Олар табиат булангъы оюн-масхаралар яхшы битмейгенин билмей болгъангъа ошай.
Бу ерде ерли полицияны ишин, гьаракатын айрыча эсгермеге тюше. Денгизде болуп турагъан къоркъунчлу гьалны хабары етишгендокъ, шагьар пляжгъа бир нече полиция машинлер алгъасагъан. Шо гюн аманлыкъны къоруйгъан къурумну къуллукъчулары сувдан гьалсыз болуп оьзлер ягъагъа чыгъып болмайгъан 14 адамны къутгъаргъан.
Алав Алиев.
