2-нчи ноябрде Дагъыстанны Башчысы Сергей Меликов Дагъыстанда  миллетлени арасындагъы парахатлыкъ ва разилиге байлавлу конференция оьтгерди. Конференцияны ишинде Дагъыстанны муфтийи Агьмат-гьажи Абдуллаев, Дагъыстанны Гьукуматыны жаваплы къуллукъчулары, алимлер, маълумат къурумланы, бары да дегенлей районланы жамият къурумларыны ва яшёрюмлени гьаракатларыны вакиллери ва тахшагьардагъы охув ожакъланы студентлери ортакъчылыкъ этди.

 

Жыйынны башында 29-нчу октябрде Магьачкъаладагъы аэропортда болгъан агьвалатланы гьакъында къысгъа фильм гёрсетилди.

– Тюнегюн биз хас асгер гьаракатда ортакъчылыкъ этме «Каспий» деген гёнгюллю батальонну йибердик,– деди Сергей Меликов. Шоланы бирлери шо гьаракатда жанын бермек бар. Оланы тенглилери буса, гюнагьсыз адамланы аралап, аэропортну ишине четим этип, шарайып иш этдилер. Шону булан палестиналылагъа не кёмек болду?

Биз барыбыз да шо бойдагъы дав гьаракатлагъа къаршыбыз. Кёп йыллар алда Президентибиз В.Путин шо бойда эки ­ онгача пачалыкъ къурма герекни билдирген.

Дагъыстанны муфтийи Агьмат-гьажи Абдуллаев митинглер ва жыйынлар булан масъаланы чечме бажарылмайгъанны айтды.

– Интернетде не де бар, бизин яшёрюмлер шонда яман къайдаланы алалар, шо зараллы болуп чыгъа, — дей муфтий. – Шо гечеги агьвалатда ортакъчылыкъ этгенлер тереклерде оьсмеген чи, оланы ата-анасы бар. Авлетлерин шолай башалман йиберип къойма ярамай. Дагъыстан – ортакъ уьюбюз, шону бузма къойма ярамай.

Жыйылгъанланы алдында Олимпия оюнланы чемпиону Ма-гьамматгьасан Абушев де сёйледи ва яшёрюмлени Дагъыстанны атын оьр этеген ишлеге къуршалма чакъырды.