– Биз ёлгъа салгъан 2019-нчу йыл багъыйлы гелди, даражалы болду. Мени 4 авлетим бар, авлетлеримни де 6 яшы ва оланы да 10 авлети бар. Барыбыз да сав саламатбыз. Олар гьариси оьз даражасына, оьмюрюне гёре мадарын этип турагъаны сююндюре.
Дагъыстанда пайдаландырывгъа берилген милли проектлени яшавгъа чыгъарылыву гьакъда эсгермей болмайсан. ДР-ни Башчысы В. Васильев борчларына бажарывлу янашагъан адам экени гёрюне.
Ер юзюнде яшайгъан бары да халкъны баш байлыгъы, миллетлени амалгъа геливюню аслу шарты – топуракъ. Шону учун мен де баш байлыкъларыбызны къолдан чыгъармайлы, заралландырмайлы, асувлу кюйде пайдаландырывгъа яшавумда айрыча тергев беремен.
2020-нчы йылда мен сюер эдим халкъыбыз бирев-биревге кёмеклешип, татывлукъда, барлыкъда ва аманлыкъда яшагъанны. Дагъыстан тышгъа, уьстге гёз къаратып, къол узатып турмайлы, оьз мадарын болдурагъан ёлланы танглагъанын сюер эдим.
Савлугъубузну да аяп, билимли болмагъа къаст этейик деп ёрар эдим. Билим – харжлагъан сайын битмейген хазна.
