Пятница, 06.07.2018г. - "ЁЛДАШ".
Оьтген жумада Россияны илму академиясыны Дагъыстан илму центрыны тил, адабият ва инчесаният институтунда «Кавказские языки: генетико-типологические общности и ареальные связи» деген теманы айланасында 6-нчы халкъара конференция оьтгерилген. Конференцияда тилни ва фольклорну ахтарагъан алимлер, шолай да Москва, Владикавказ, Тифлис, Грозный, Майкоп, Уфа, Нальчик, Цхинваль ва Магас шагьарлардан адабиятчылар ортакъчылыкъ этген.
Конференцияны ача туруп, филология илмуну доктору, эсгерилген институтуну директоруну заманлыкъгъа борчларын кютеген Абусупьян Акамов конференцияны ортакъчыларына къаршылав сёзюн айтгъан. Ол эсгерген кюйде, кавказ тиллеге багъышланып оьтгерилеген конференция мердешли кюйде ара бёлмей гьар йыл оьтгериле, къурум комитетни чакъырывуна гёре 60-дан артыкъ тилни, адабиятны ва фольклорну уьстюнде ишлейгенлер ортакъчылыкъ этме гьазир экенин билдирген. Конференцияда ортакъчылыкъ этмеге имканлыгъы болмагъан алимлер буса оьзлени докладларын йиберген.
А. Акамов сёзюн узата туруп булай деген:
– Бу конференцияны оьтгерив кавказ тиллени ич масъалаларын ахтарывда, шолай да Дагъыстанда ва Темиркъазыкъ Кавказда тилни оьсювюн ахтармагъа ва ахтарывлагъа тергевюн артдырмагъа болушлукъ эте.
Конференцияны ишин узата туруп, академик А. С. Чикобаваны кавказ тиллени ва фразеологияны тил аралыкъ байлавлукъланы ва нах-дагъыстан тиллени топонимиясын ахтарывда этген къошумуну гьакъында пикру алышдырыв юрюлген.
Конференцияны ахырында «дёгерек столну» айланасында Кавказдагъы тиллени гьалиги ва гележек гьалы арагъа салынгъан ва конференцияны гьасиллери чыгъарылгъан .
