Халкъара ва Бютюнроссия яратывчулукъ конкурсларда ортакъчылыкъ этген ва савгъатлы биринчи ерлеге ес болгъан пагьмулу оьрюм яшлар булан маданият министерлигинде ёлугъув болду. Шонда ДР-ни маданият министри Зарема Бутаева 30 яшгъа дипломлар ва министерликни, ДР-ни Халкъ Жыйыныны депутатларыны атындан савгъатлар тапшурду. «Шагьарны ичи» деген проектни юрютеген депутат Нариман Темуркаев буса яшланы 19 муаллимине акъча савгъатлар тапшурду.
Дагъыстанны яш пагьмулары «Умутланы елкенлери», «Денгизни шавлалары», «Россияны пагьмулары», «Пагьмулагъа – ёл», «Арт-кампус» деген ва оьзге тюрлю халкъара, бютюнроссия конкурсларда биринчи ерлени алгъан.
ДР-ни билим беривге, илмугъа, маданиятгъа, спортгъа ва туризмге къарайгъан комитетини ёлбашчысы Мурат Пайзуллаев, Дагъыстан пачалыкъ филармонияны чебер ёлбашчысы Ирина Нахтигаль, операны ва балетни театрыны чебер ёлбашчысы Наталья Макеева пагьмулу яшланы къутлады ва гележекде де олагъа уьстюнлюклер ёрай туруп, «Сизин йимик пагьмулу наслубуз болгъан сонг, Дагъыстанны маданиятыны гележеги де бар», – деп, янгы йыл булан да къутлап, оьзлени ёравларын айтды.
