Заман токътавсуз алгъа бара. Бирдагъы-бир 2018-нчи йылыбыз тарихге гирди. Янгы 2019-нчу йыл бизге оьзюн гёзлеген кюйде етишип гелди. Гьасиллени чыгъарма, гележекге янгы планлар къурма заман гелди. Кёп-кёп эсибизде къалагъан агьвалатланы гетген йылда къойдукъ. Гьар номерден-номерге къыставуллу маълумат бермек учунгъу иш, язылывну масъалалары, енгил этип айтгъанда, бизин аз алапабызгъа тийишли даражада ишлеме гьазирлиги булангъы журналистлер етишмейгенлик, йыракъда яшайгъанлагъа сайтны къоллама тюшегени ва къутсуз бюджетибиз – булар барысы да бизин башыбызда.
Эсгерилген гьалларда баш редакторгъа адам сукъланмасдай гьалгъа тарыма, журналист гьисапда да макъалалар язма, сонг да ёлбашчылыкъ этме де тюше. Оьзюню башына тюшген намусланы ол бажарывлу кюйде кюте.
Бизин охувчулагъа оьзюню халкъыны тарихине, маданиятына, ана тилине жанлы янашагъаны саялы баракалла. О ишде гёнгюллюк тувдурагъан себеплер де ёкъ тюгюл.
Шолай иштагьлыкъ булан бизин оьз мухбирлерибиз де ерлерде маълуматлар, макъалалар, баянлыкълар, очерклер гьазирлей туруп чалыша. Олар оьзлени ишинде, заманны игитин яратывда гьаракатчылыкъ ва ругьланыв гёрсетелер.
Редакцияда тюрлю-тюрлю хасиятлы адамлар ишлей. Олар – гьарисини оьз къылыгъы, оьзюне хас менлиги булангъы адамлар. Тек оланы барысыны да бирни йимик пагьмусу барлыгъы, оьзлер чыгъарагъан газетни сюегенлиги бар. Ону олар бир заманда да бир затгъа да алышдырмажакълар. Олар башгъа ерлерде ишлеп, къазанма амал этсе де, амма бай болмакълыкъ чы олагъа ёкъ зат. Умуми кюйде алгъанда шатлыкъда болмаса да, чыдамлы яшайбыз.
Мени эсиме гелеген кюйде, гелеген Къабанны йылында акъча учун ишлемейген, ана тилине, халкъына сюювю учун ишлейген иш ёлдашларыбызны къыйматлама имканлыкъ болур бугъай.
Яхшылыкъгъа алгъаса дей къумукълар. Янгы йылда болма герек янгы умутланы гьакъында айта туруп, олар барысы да яшавгъа чыкъсын деме сюебиз. Сёзню тамамлай туруп, бирдагъы да редакцияны атындан Янгы йыл булан сизин къутлайбыз, сизге савлукъ, уьстюнлюк, уьюгюзге мадарлыкъ ва юреклеге парахатлыкъ ёрайбыз!
