Январ айны 13-нде Магьачкъалада Максим Горькийни атындагъы орус драма театрда Иса пайхаммар тувгъан гюнге байлавлу чаралар оьтгерилди. Ортакъчылыкъ этгенлени арасында Дагъыстан Республиканы Гьукуматыны Председателини заместители Рамазан Жафаров, Дагъыстан Республиканы Халкъ Жыйыныны Председателини заместители Елена Ельникова, гьар тюрлю ведомстволаны, дин къурумланы вакиллери де бар эди.
Байрам чараны ача туруп, кешиш Варлаам жыйылгъанланы байрам булан къутлады ва регионну ёлбашчысыны, Дагъыстан Республиканы милли политикагъа ва дин аралыкъларына къарайгъан министерлигини ва Дагъыстан Республиканы маданият министерлигини атына дин байрамланы оьтгерме онгайлыкълар болдурагъаны учун оьзюню янындан баракалласын билдирди.
«Биз, хачпереслер, бусурманлар, иудейлер бизин ортакъ байрамыбыз булан бир-биревню къутлайбыз. Шо буса – бизин халкъ учун этеген бек уллу яхшылыгъыбыз. Бирче иш гёрюп билеген саялы шолай яхшылыкълар да тувулуна», – деп эсгерди оьзюню сёзюнде кешиш Варлаам.
Рамазан Жафаров Дагъыстан Республиканы Башчысы Владимир Васильевни къутлав кагъызын охуду ва булай чараланы оьтгериливю регионну халкълары учун агьамиятлы экенин айтды.
Дагъыстан Республиканы Халкъ Жыйыныны Председатели Хизри Шихсайитовну ва депутат корпусну атындан Елена Ельникова да къутлавларын эсгерди.
Байрам чараланы барышында «Яратгъаныбызны гёзел дюньясы» деген яшланы яратывчулугъуну конкурсуну регион бёлюгюню алдынлыларына савгъатлар тапшурулду. Дагъыстан Республиканы милли политикагъа ва дин аралыкъларына къарайгъан министри Энрик Муслимов байрам чараланы оьтгерме кёмек этгенлени баракалла кагъызлар булан савгъатлады.
Максим ЭСЕНБИЕВ.
