Тюнегюн Магьачкъалада Дагъыстанны Парламентини бу йылгъы ахырынчы сессиясы болду. Шону Дагъыстанны Халкъ Жыйыныны Председатели Хизри Шихсайитов ачды ва юрютдю. Сессияны ишинде республиканы Башчысы Владимир Васильев, гьакимликни иш кютюв булан машгъул къурумларыны ёлбашчылары, жамият къурумланы ва маълумат къуралланы вакиллери ортакъчылыкъ этдилер.
Сессияны барышында ортагъа салынагъан масъалалагъа къаралды.
Айрыча эсгерип айтгъанда, депутатлар Дагъыстан Республиканы «Дагъыстанны 2020-нчы йылгъа ва 2021–2022-нчи йыллагъа республика бюджетини гьакъындагъы» Законуну проектин экинчи, ахырынчы охувдан сонг къабул этди. Халкъ Жыйынны бюджетге, акъча маялагъа ва налоглагъа къарайгъан комитетни председатели Сейдуллагь Исакъов ва Дагъыстанны Гьукуматыны вице-премьери Гьажимагьаммат Гьюсейнов бюджетни аслу оьлчевлерине байлавлу маълуматланы малим этдилер.
Республиканы Башчысы этген тюзелтивлени натижасында республика бюджетни аслу оьлчевлерини къадарлары гёрмекли кюйде артдырылгъан. Гелеген йылгъы бюджетге налог ва налогдан оьзге хайыр акъчаланы оьлчев даражалары 2,6 миллиардгъа арта.
Сонг, федерал бюджетден этилеген кёмек гьисапдагъы акъча да 10,5 миллиард манатгъа гётерилген. Шолайлыкъда, республика бюджетни умуми оьлчевю 128,5 миллиард манатны къадарында токъташдырылгъан. Алда шону къадары 125,3 миллиард болгъан.
Арагъа салып ойлашывну барышында фракцияланы уьчюсюню де вакиллери С.Агьматов, М.Магьмутов, К.Давдиев ёлдашлар да чыгъып сёйледилер. Олар документни якъладылар ва шо дагъыстанлыланы яшавун яхшылашдырывгъа бакъдырылгъан деп билдирдилер. Оьзге депутатлар да оьз пикруларын айтдылар. Депутатланы тилевюне гёре премьер-министр А.Здунов бир нече агьамиятлы масъалалагъа гёре баянлыкълар берди.
Эсгерилген масъалалагъа гёре айтылгъан чакъы затланы жамын чыгъара туруп, Хизри Шихсайитов бугюн республикада болуп турагъан яхшы тюрленивлени янгыз гёзевлер гёрмей къалмагъа болагъанны эсгерди. Ол болуп турагъан ишлеге белсенип къошулмагъа, гьалланы тюз къыйматламагъа ва шолай да масъалаланы арагъа салып ойлашывда жанлы кюйде ортакъчылыкъ этмеге депутатланы барысын да чакъырды.
Сессияда Дагъыстан Республиканы медицина страхованиесини территориялы фондуну 2020–2021-нчи йыллагъа бюджетини гьакъындагъы закону да экинчи гезик охугъан сонг къабул этилди.
Сессияны ахырында Дагъыстанны Башчысы Владимир Васильев чыгъып сёйледи, кютеген ишлери саялы Дагъыстан Парламентине разилик билдирди, республикада болуп турагъан ишлени бир тайпаларына багьа да берди.
Дагъыстанны Халкъ Жыйыныны прес-къуллугъу.
