Сентябр айны 24-нде бизин республикада яшёрюмлени «Каспий-2019» деген халкъара форуму оьзюню ишин башлады.
Къарабудагъгент районда ерлешген «Каспий» деген санаторийде мердешленип гелеген кюйде юрюлеген шо агьамиятлы агьвалатгъа багъышланып оьтгерилген шатлыкъларда ДР-ни яшёрюмлерини ишлерине къарайгъан министр Камил Сайитов, форумну директору Рустам Гьамитов ва гьакимлик къурумларыны оьзге жаваплы къуллукъчулары да ортакъчылыкъ этди.
Камил Сайитов форумну ортакъчыларын къаршылагъан сонг, олагъа барысына да уьстюнлюклер ёрады ва оьзюню сёзюн булай узатды: «Бу форумгъа бизин пачалыкъны ва ювукъ тыш пачалыкъланы инг яхшы ва гьаракатчы яшёрюмлери жыйылгъанны билемен. Форумну ишинде сизге уьстюнлюклер, янгы къурдашлар ва пайда берер йимик билимлер алмакъны ёрайман. Бу майданда биз дагъы да ёлугъажакъгъа шеклик этмеймен».
Форумну директору Р. Гьамитов буса форумну гьар ортакъчысы оьзюню уьюнде йимик гьис этмекни гьайында экенни эсгерди. Ол форумну ортакъчыларына пайдалы ва натижалы гьаракат ёрады.
Форумну ачылывуна багъышлангъан ерли йыравланы концерти ва башгъа шатлы чаралар да болду .
Форумну ишини барышында 3 тюрлю агъымларда чаралар оьтгерилди: яш лидерлер, далапчылар ва маълумат къуралланы касбучулары. Шолай да, спорт ва яратывчулукъ ишлер, лекциялар, мастер-класлар юрюлдю.
Форумну ортакъчылары Дербентге ва Сулак къаягъа (каньонгъа) сапаргъа чыкъды.
Яшёрюмлени форуму 2011-нчи йылдан берли гьар йыл оьтгериле ва онда 18–30 йыллыкъ чагъындагъы яшёрюмлер де ортакъчылыкъ эте.
Бизин мухбирибиз.
