Гьали-гьалилерде Магьачкъалада «Турналар» («Журавли») деген илму-савлукъ сакълав комплексинде Россия Федерацияны тергев-гьисаплашыв къурумланы ёлбашчыларыны «Милли программаланы яшавгъа чыгъарылагъан кююн гёзден гечирив» деген темагъа гёре Бютюнроссия генгеши болду.
Шону ача туруп, Дагъыстанны Гьисап палатасыны председатели Билал Жагьбаров къонакълагъа ва мунда жыйылгъанланы барысына да милли проектлени уьстюнлю кюйде яшавгъа чыгъарывдан халкъны яшав даражасы ва таъминлиги гьасил болагъанны эсгерди.
Генгешни ортакъчыларыны алдына чыгъып сёйлей туруп, республиканы Халкъ Жыйыныны башчысы Хизри Шихсайитов, Дагъыстанны Башчысыны, депутатланы ва республиканы Гьукуматыны атындан жыйылгъанлагъа къутлав сёзлер айтды. Милли проектлени яшавгъа чыгъагъан кююн гёзден гечирип къарамакъ муратда мунда уьлкебизни кёп тюрлю ерлеринден гелген вакиллер бар экенине айрыча тергев бакъдырды.
– Бу тайпа проектлер Россия Федерацияны Президенти Владимир Владимирович Путинни сиптеси булан онгарылгъан ва ватандашланы яшавуну сан янына тиеген чакъы бары да масъалалагъа багъышлангъан. Шону кютювню гьасиллери нечик экенинден буса Россияны илму-техника якъдан алгъа барыву, экономика якъдан оьсювюню барышы таъмин этиле.
Шоллукъда, пачалыкъ ёлбашчылыгъыны тармагъында тергев-гьисаплашыв къурумлар лап аслу бёлюклени бириси болуп токътай. Олар ишни тюзевлю кютегенинден уьлкени маишат-экономика якъдан оьсеген кюю кёп къадар гьасил бола, – деди Х. Шихсайитов.
Сонг Дагъыстан Гьукуматыны Председатели Артём Здунов булай генгешни Дагъыстанда оьтгерилегени республикада гьаллар яхшы ягъына багъып алышынма башлангъанын исбат этегенни айтды.
Россияны Гьисап палатасыны аудитору Дмитрий Зайцев, оьзлени исси къаршылагъаны, бырынгъы Каспий денгизни ягъа боюна ювукъда пикру алышдырмагъа ва сынав уьйренмеге оьзлеге багъыйлы шартлар яратгъаны саялы, баракалла билдирди. Тергев-гьисаплашыв къурумланы гьакимиятны иш кютюв къурумлары булан гьакълашып бирче иш гёрювю эки де якъ учун умпагьатлы гьаракат экенни англайгъанны билдирди…
Къысгъа болжаллы танапусдан сонг генгеш онгача ишчи группалагъа бёлюнюп узатылды. Шоларда политика, билим берив, маданият, савлукъ сакълав, экология, экономика тармакълардагъы милли проектлеге тиеген масъалалар арагъа салынып къаралгъан. Россияны Гьисап палатасыны милли проектлени яшавгъа чыгъарылагъан кююне жавап береген къуллукъчулары сынав алышдыргъанлар.
Бизин маълумат.
