Бизин республикабыздагъы шагьарланы, посёлокланы ва юртланы ичинде къоллавчуланы яшавлукъ учунгъу талаплары, демек, онгайлыкъланы болдурув толу кюйде рази къалдырмай. Ерлерде орамланы, ёлланы ва шолай да шагьарланы, юртланы ягъа бойларын ёрукълашдырыв-ярашдырыв бугюнню аслу масъаласы болуп токътайгъаны англашыла.
Шону гьисапгъа алып, Дагъыстанны Гьукуматыны сиптечилиги булан сентябр айны 10-нда оьтгерилген уллу генгешинде де мекенли гьакълашыв юрюлген эди. Неге десегиз, бизин республикабызда яшавгъа чыгъарылма тюшеген «Ёллардагъы аманчлыкъ учун», «Шагьарларда онгайлы яшавлукъ шартланы болдурув», «Тахшагьардагъы В. И. Ленинни атындагъы майданны толу кюйде ярашдырыв» ва шолай оьзге тюрлю агьамиятлы проектлер пайдаландырылагъаны тергевсюз къалмагъа ярамай.
Гертиден де, къоллавчуланы талаплары артып тербей, айлана якъда онгайлыкъланы артдырыв буса акъсай. Муна шо саялы да арадан оьтген 30 йылны ичинде йиберилген кемчиликлени алдын алмаса бажарылмай. Орамланы, ёлланы, шагьар майданланы, бавланы даражасы кётюр болгъан.
Бугюнлерде Магьачкъалада уьстде эсгерилген агьамиятлы масъалагъа байлавлу болуп гьар тюрлю пачалыкъ, жамият ва дин къурумланы къуршап генг кюйде гьакълашыв болагъаны гьакъда да айрыча эсгерме тюше. Магьачкъала шагьарны баш архитектору Незир Гьюсейнов ва ону заместители Иса Магьамматовну ёлбашчылыгъы булан оьтгерилмеге герекли чараланы план-графиги, гезиги токъташдырыла.
Шолар къурулагъанда шагьарда яшайгъан ватандашланы талаплары ва арзлары гьисапгъа алына. Шолайлыкъда, Магьачкъалада лап да бузукъ участкаларда ярашдырыв ишлер давам этиле. Нахимов, Расул Гьамзатовну атындагъы орамларында ва шолай башгъаларында ярашдырыв ишлер сан яны булан оьтгерилген…
Магьачкъалада В. И. Ленинни атындагъы баш майданда да ярашдырыв ишлени оьтгеривге тергев арта. Шагьар майдандагъы эсделикни ва ону айланасындагъы скверлени янгыртывгъа байлавлу ишлер башлангъаны тергевню тартмай болмай.
Шагьар майдандагъы янгыртывлар тахшагьарда яшайгъан ватандашланы таклифлери гьисапгъа алынып оьтгериле. Шолайлыкъда, мунда шаршарланы (фонтанланы) ва шолай да адамлар чыгъагъан ерлени, ерни тюбюнде транспорт салынагъан онгайлыкъланы болдурма гёз алгъа тутула.
