Узакъ зат

Тазиятда олтурагъан тамазалар динни ва дин низамны гьакъында кёп пайдалы лакъыр этелер. Тюзю, бир-бирде олар, лакъыр эте туруп, тазиятгъа къайгъырышмагъа адам гелгенни де хапарламай къалалар. Шолай бир гезик тазиятда къысгъа ва узун сёзню гьакъында айта турагъанда, тазиятгъа Сатыбал геле. 

Сатыбал дуаны охуп битгендокъ, Алис, алгьамны да охуп:
– Магьаммат, гьали англадынгмы Сатыбал агъавубуз гьакъыллы адам экенни, – дей. 
– Неге дейсен? – дей Магьаммат, огъар соравлу къарап. 
– Дуасы къысгъа. 
Дуасы къысгъа адам гьакъыллы, дуасы узун адамны гьакъылы къысгъа деп ким айта деген сорав тува тазиятда. Бирев де бир сёз де айтмай токътагъанда, Алис:
– Кёп сёзню азы яхшы, аз сёзню оьзю яхшы дей халкъны терен ою. Узун сёзню бир дынкъы болмай къалмас. Къысгъа сёз гьакъылны башлапгъы белгиси ва баш белгиси деп эсиме геле, – деген Алис. 

Рази болуп чу алмажакъман

– Нете, ювугъум, о дюньядан повестка гелген бугъай, – дей авруп ятагъан Акъайгъа Алис, масхара этип. 
– Гелгенге ошай, ювугъум. Гелген буса да, повестканы къол басып чы алмажакъман, – деп, Акъай иржайгъан дей.