Пятница, 01.06.2018г. - "ЁЛДАШ".

Бугюн – июн айны биринчи гюню. Байрам гюн. Дюр, дюр, яшланы байрамы. Гьар йыл да мердешли кюйде гиччипавлар да, уллулар да жыйылып оьтгерилеген яшланы якълавуну гюню.

Уллулар гьайыгъызда къалып, яшлар, бугюн сизин учун шагьарларда чы нечик де, гиччи юртларда да, билебиз, байрам шатлыкълар юрюле. Биз ойлашагъан кюйде, Яшланы якълавуну гюню йыл боюнда белгилейген байрамланы арасында оьзюню оьтгеривню маънасы айрыча артыкъ, лап да тарыкълыларындан гьисаплана. Неге тюгюл, биз, эсли наслу, бары да умутларыбызны оьзлер булан байлайгъан, оьзлерден сююнеген, оьзлер булан къуванагъан, янгыз оьзлени ойлап яшайгъан, яллав яйда исив береген гьариси бир гиччи гюнге ошайгъан яшлардыр.

Оьзюгюзге берилген имканлыкълардан пайдаланып, бугюн сиз шиърулар охуп, йырлап, согъулагъан тюрлю макъамлагъа гёре бийип де тазза къанажакъсыз. Гёрсетген шолай пагьму бажарывлугъугъуз гьисапгъа алынып,   сизге, яшлар, барыгъызгъа да гиччирек савгъатлар тапшурулажагъына да инанабыз.

Биз сизин барыгъызны да байрам булан гьакъ юрекден къутлап, яхшы савлукъ, кёп-кёп яхшылыкълар ёрайбыз. Яшлар, сизин яшавугъузда шулай байрамлар бир тюгюл, кёп керенлер болсун. Насипли болуп къалыгъыз яшавда! Къаршылайгъан гьар та­нгыгъыз да, гьар тюрлю къуллукълар этип йибереген гьар гюнюгюз де, яшавну гьар мюгьлети де сизин сююндюрсюн, яшлар! Сизин барлыгъыгъыз – бизин байлыгъыбыз. Сиз бар болу­гъуз, яшлар, барыгъыз да!