Пайдалы ишлеге белсенген



      Къаягент районда «Халкъны социал талапларын кютеген комплекс центры» деген пачалыкъ бюджет идарасы ишлейгенли 4 йыл бола. Бу идарада 9 бёлюк бар. Шоланы 2-си яшлар ва агьлюлер булан машгъул, 7-си буса эсли адамланы ва сакъатланы къуллукъларын кютелер. Шоланы 6-сыны къуллукъчулары 1342 адамны уьйлерине барып, яшарлыкъ, медицина, законлукъ борч­ларын якълавда ортакъчылыкъ этелер.



Центрда шолай адамлагъа иш гюнню узагъында кёмек къолун узатагъан бёлюк де бар. Мунда гьар айда 15 адамгъа кёмек гёрсетиле. Бёлюкню касбучулары къуршалгъанланы компьютерни тюз къолламагъа уьйрете. Интернет-клуб ачылгъан, савлу­гъун беклешдирмеге кёмек этеген медицина кабинет онгарылгъан, Аллагьгъа къуллукъ этегенлер учун айры ер гёрсетилген. Бёлюкге къуршалгъанланы гьалын яхшылашдырмакъ муратда гьар тюрлю маданият чаралар, оюнлар да оьтгериле.



Яшланы ва яшлары булангъы агьлюлени заманлыкъгъа къабул этеген бёлюкню къуллукъчулары уьстде эсгерилген ва оьзге къуллукъланы гьар айда 35 адамгъа гёрсете. Мунда юрюйгенлени арасында оьтгерилеген ярышланы, конкурсланы, оьзге чараланы, къуллукъланы санаву, умуми кюйде алгъанда, гьар айда 17 мингден айлана.



Яшланы ва яшлары булангъы агьлюлени иш гюнню узагъында къабул этеген бёлюкню къуллукъчулары центрны оьзге къуллукъчуларындан артда къалмайлар. Оланы гючю булан гьар айда 48 адамгъа 15 мингден артыкъ къуллукъ этиле.


  



Кютюлеген къуллукъланы генглешдирмек муратда центрда къурулгъан янгы «Социальный туризм» деген группа ватандашланы республикабызны тарихи, маданият варислиги булан таныш эте. Къуллукъчулар 156 адамны къуршап, йылны узагъында рес­публиканы 14 шолай ерлерине баргъан. Сонг да, совет кинолагъа къарамагъа сюегенлер учун 93 къуллукъ кютюлген, 37 дарс оьтгерилген. «Социал такси» деген къуллукъну да центргъа юрюйгенлер кёп сюелер. 2018-нчи йылда шолай къуллукъ юрт ерлеге 404 керен чыгъып, 371 ватандашгъа этилген. Гетген йыл «Аналагъа –кёмек къол» деген къуллукъгъа байлавлу да 14 чара оьтгерилген. Шону натижасында авур аврувлу яшлары бар 83 анагъа кёмек этилген.



2017-нчи йылдан тутуп, центрда 10-15 йыллыкъ охувчу яшланы къуршап, «Юрек ачытыв» деген гьар тюрлю гьаракатлагъа гёнгюллю кюйде къуршала­гъанланы гюбю къурулгъан ва иш гёре. Янгыз гетген йыл оланы гьаракаты булан 56 ватандашгъа 110 къуллукъ этилген.



Ватандашлагъа «Чалт кёмек гёрсетеген бригаданы иши» центр­ны чалышывунда айрыча ер тута. Бригада районлулар булан юрютюлеген ишлени асувлу оьтгермеге имканлыкълар ярата. 2018-нчи йылда бригадагъа къуршалгъан касбучулар 217 адамгъа 650 къуллукъ этмеге бажаргъан. Булай группалар центрда дагъы да бар.



Эсли адамланы, яшланы ва яшлары булангъы агьлюлени арасында байрам чараларын оьтгеривге де артдагъы йылларда кёп агьамият бериле. Бу ишде центргъа «Розарий», «Таза юрек», «Гюнеш дюньям» деген фондлар, Къаягент районда Россияны халкъларыны мердешленген маданият центрыны къуллукъчулары яхшы кёмек этелер.



Умуми кюйде алгъанда, идараны касбучулары районда яшайгъан 2658 адамны гьар тюрлю къуллукъларын кютген.



– Биз кёмек къаравуллайгъан районлуларыбызгъа тарыкъ къуллукъланы санав янын артдырып къоймай, оланы сан янын гётермеге де къасткъылабыз, – дей бизин булангъы лакъырында центрны директору Элбрус Мусаев. – Яхшы натижалар олагъа йимик бизге де къуванч гелтире. Гьар гюнлюк ишибизде бизге гелеген ватандашларыбызны умутларын, талапларын тюз англап, оланы гьарисине заманында тийишли кёмегибизни этип разилигин къазанмагъа гьаракат этебиз.


Къаягент районда кёп миллетлени вакиллери яшай. Центрны директору, касбучулары юрютеген ишинде гьар миллетни тилин, адатларын, оьзге хасиятларын гёз алгъа тутуп чалышалар. Мунда 3 айда бир керен социал къуллукъчулар булан уьстде эсгерилген масъалаланы тюз чечивге байлавлу семинарлар да оьтгериле. Гьар семинарны пайдасы уллу.



Пайдалы ишлер этеген касбучулагъа, центрны коллективине ишинде биз де янгы уьстюнлюклер ёрайбыз.



Магьамматрасул Ибрагьимов.

Къаягент район.



Авторизация
*
*
Регистрация
*
*
*
Согласны с условиями сайта?
Генерация пароля