– Дагъыстан Республиканы Башчысы Владимир Васильевни Халкъ Жыйынына Чакъырывунда савлукъ сакълав тармакъны масъалаларыны гьакъында да яхшы агьамият берип айтылды. Инг башлап медицина къуллукъну сан янын яхшылашдырма тарыкъ.
2019-нчу йылда Республикада 11 савлукъ сакълав идара къурулажакъ. Йыл сайын медицина къуллукъчуланы санаву арта. Оьр технологияланы къоллап этилеген къуллукълар да арта. 2018-нчи йылда дагъыстанлылардан 6 минг адам шолай кёмек булан таъмин болгъан буса, 2019-нчу йылда шо кёмекден 7 минг адам пайдаланажакъ.
Савлукъ сакълав тармакъгъа юрт ерлерде яш касбучуланы къуршамакъ да – умпагьатлы иш. «Земский доктор» деген программаны яшавгъа чыгъара туруп, 2019-нчу йылда юрт ерлеге 224 врач ва 10 фельдшер йиберме деп гёз алгъа тутулгъан. 2018-нчи йылда буса шо программаны яшавгъа чыгъара туруп, 202 касбучу ишге алынгъан.
«Скорая помощь» ва башлапгъы савлукъ сакълав къуллукъну да сан яны мекенлеше. Республика бюджетден таба 70 автомобил сатып алынажакъ, 50 флюорография аппаратлар йиберилежек.
«Единая Россия» политика партияны «Здоровое будущее» деген регион проекти Республиканы Башчысы алгъа салагъан бары да масъалаланы чечме кёмек этежек.
